ഡല്‍ഹി: രാജ്യത്ത് കൊവിഡ് വ്യാപനം രൂക്ഷമാവുന്ന സാഹചര്യത്തില്‍ വീടുകളിലേക്ക് തിരികെ മടങ്ങുന്ന കുടിയേറ്റ തൊഴിലാളികള്‍ക്ക് ധനസഹായം നല്‍കണമെന്ന് കോണ്‍ഗ്രസ് നേതാവ് രാഹുല്‍ ഗാന്ധി. 'കുടിയേറ്റ തൊഴിലാളികള്‍ വീണ്ടും വീടുകളിലേക്ക് മടങ്ങുകയാണ്. ഈ സാഹചര്യത്തില്‍ കേന്ദ്രസര്‍ക്കാര്‍ കുടിയേറ്റ തൊഴിലാളികളുടെ ബാങ്ക് അക്കൗണ്ടുകളില്‍ പണം നിക്ഷേപിക്കേണ്ടത് സര്‍ക്കാരിന്റെ ഉത്തരവാദിത്തമാണ്'- രാഹുല്‍ ട്വീറ്റ് ചെയ്തു.
കൊവിഡ് വ്യാപനത്തിനുകാരണം പൊതുജനങ്ങളാണെന്ന് കുറ്റപ്പെടുത്തിയ സര്‍ക്കാരിന് ഇപ്പോള്‍ ജനം തെരുവില്‍ നില്‍ക്കുമ്പോള്‍ സഹായിക്കേണ്ട ബാധ്യതയില്ലേ എന്നും രാഹുല്‍ ചോദിച്ചു. ഡല്‍ഹിയില്‍ ആറ് ദിവസത്തെ ലോക്ക് ഡൗണ്‍ പ്രഖ്യാപിച്ചതിനു പിന്നാലെ നിരവധി കുടിയേറ്റ തൊഴിലാളികളാണ് ഡല്‍ഹി വിടാന്‍ നിര്‍ബന്ധിതരായത്. ഈ സാഹചര്യത്തിലായിരുന്നു രാഹുല്‍ ഗാന്ധിയുടെ പ്രതികരണം.
ഡല്‍ഹി, രാജസ്ഥാന്‍, മഹാരാഷ്ട്ര, തമിഴ്‌നാട് തുടങ്ങിയ സംസ്ഥാനങ്ങള്‍ ലോക്ക്ഡൗണും സമാന നിയന്ത്രണങ്ങളുമേര്‍പ്പെടുത്തിയിട്ടുണ്ട്. 2.73 ലക്ഷം പേര്‍ക്കാണ് കഴിഞ്ഞ ഇരുപത്തിനാല് മണിക്കൂറിനിടെ കൊവിഡ് സ്ഥിരീകരിച്ചത്.
