ഡല്‍ഹി: കഴിഞ്ഞദിവസം ഡല്‍ഹിയിലെ ഇസ്രായേല്‍ എംബസിക്കു സമീപം നടന്ന സ്‌ഫോടനത്തില്‍ ഇറാന് ബന്ധമെന്ന് സംശയം. വ്യക്തമായ തെളിവുകള്‍ ലഭിച്ചിട്ടില്ലെങ്കിലും സംഭവത്തില്‍ ഇറാന് പങ്കുണ്ടെന്ന് സംശയിക്കുന്നതായി പ്രത്യേക അന്വേഷണസംഘം വ്യക്തമാക്കി. സംഭവവുമായി ബന്ധപ്പെട്ട് വിസ കാലാവധി കഴിഞ്ഞ ഡല്‍ഹിയിലെ ഇറാന് സ്വദേശികളെ ചോദ്യം ചെയ്തിരുന്നു. കേസ് എന്‍ഐഎ അന്വേഷിക്കുമെന്ന് റിപ്പോര്‍ട്ടുകളുണ്ട്.
സൈനിക ആവശ്യങ്ങള്‍ക്കായി ഉപയോഗിക്കുന്ന പി.ഇ.ടി.എന്‍ എന്ന രാസവസ്തുവാണ് ഡല്‍ഹിയിലെ സ്‌ഫോടനത്തിനായി ഉപയോഗിച്ചിട്ടുളളതെന്ന് കണ്ടെത്തിയിട്ടുണ്ട്. അല്‍ഖ്വായിദയുടെ ആക്രമണങ്ങളിലാണ് പൊതുവേ ഈ രാസവസ്തു കണ്ടെത്തിയിട്ടുളളതെന്ന് അന്വേഷണ സംഘം വ്യക്തമാക്കി. അതേസമയം സ്‌ഫോടനത്തിന്റെ ഉത്തരവാദിത്വം ഏറ്റെടുത്ത് ജെയ്‌ഷെ അല്‍ ഹിന്ദ് എന്ന സംഘടന രംഗത്തുവന്നിരുന്നു. ഇതൊരു തുടക്കം മാത്രമാണ്, കൂടുതല്‍ സ്ഥലങ്ങളില്‍ സ്‌ഫോടനങ്ങളുണ്ടാകുമെന്നും ടെലഗ്രാം പോസ്റ്റിലൂടെ സംഘടന മുന്നറിയിപ്പ് നല്‍കിയിരുന്നു. സംഘടനയെക്കുറിച്ചുളള മറ്റു വിവരങ്ങള്‍ അന്വേഷണസംഘം ശേഖരിക്കുകയാണ്.
വെളളിയാഴ്ച്ച വൈകുന്നേരം അഞ്ച് മണിക്കാണ് ഡല്‍ഹിയിലെ ഇസ്രായേല്‍ എംബസിക്കു സമീപം എപിജെ അബ്ദുല്‍ കലാം റോഡില്‍ സ്‌ഫോടനം നടക്കുന്നത്. സ്‌ഫോടനത്തില്‍ ആളപായമില്ല. റോഡരികില്‍ നിര്‍ത്തിയിട്ടിരുന്ന കാറുകള്‍ക്ക് കേടുപാടുകളുണ്ടായി. ഇന്ത്യ ഇസ്രായേല്‍ നയതന്ത്രബന്ധത്തിന്റെ 29-ാം വാര്‍ഷികദിനത്തിലായിരുന്നു ഇസ്രായേല്‍ എംബസിക്കുസമീപമുണ്ടായ സ്‌ഫോടനം.
#readMore-7591#
