പാരിസ്: ആര്ട്ടിഫിഷ്യല് ഇന്റലിജന്സ് (എ ഐ) നമ്മുടെ എല്ലാ ജോലികളും ഏറ്റെടുക്കുമെന്ന് ടെസ്ല സിഇഒ ഇലോണ് മസ്ക്. മനുഷ്യര്ക്ക് ഇനി ജോലി ഉണ്ടാകില്ലെന്നും അതത്ര മോശം കാര്യമല്ലെന്നും ഇലോണ് മസ്ക് പറയുന്നു. ഭാവിയില് ജോലി ചെയ്യുന്നത് ഓപ്ഷണലായി മാറുമെന്നും എ ഐയും റോബോട്ടുകളും നമുക്കുവേണ്ടി ജോലി ചെയ്യുമെന്നും മസ്ക് പറഞ്ഞു. പാരിസില് നടന്ന വിവാടെക് 2024 എന്ന എ ഐ ടെക് കോണ്ഫറന്സില് സംസാരിക്കുകയായിരുന്നു അദ്ദേഹം.
'ജോലി ചെയ്യുക എന്നത് ഒരു ഹോബിയായി മാറും. നിങ്ങള്ക്ക് താല്പ്പര്യമുണ്ടെങ്കില് ചെയ്യാം. എ ഐയും റോബോട്ടുകളും നിങ്ങള്ക്ക് ആവശ്യമുളള സേവനങ്ങള് നല്കും. ഈ സാഹചര്യത്തില് എല്ലാവര്ക്കും ഉയര്ന്ന വേതനം ലഭിക്കണം. അടിസ്ഥാന വേതനം മാത്രം ലഭിച്ചാല് പോര. കംപ്യൂട്ടറുകളും റോബോട്ടുകളും മനുഷ്യരേക്കാള് മികച്ച രീതിയില് ജോലി ചെയ്താല് പിന്നെ മനുഷ്യര്ക്ക് പ്രാധാന്യമുണ്ടാകുമോ എന്ന ചോദ്യവും ഉയരുന്നുണ്ട്. എന്നാല് എ ഐയ്ക്ക് അര്ത്ഥം നല്കുന്നത് മനുഷ്യരാണ്'- ഇലോണ് മസ്ക് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ലോകത്തെ സകല മേഖലയിലും ഏതാനും വര്ഷങ്ങളായി എ ഐയുടെ ഉപയോഗം വര്ധിക്കുകയാണ്. ചാറ്റ്ജിപിടി, ജെമിനി എ ഐ തുടങ്ങിയ ചാറ്റ്ബോട്ടുകളുടെ സേവനങ്ങള് പ്രയോജനപ്പെടുത്തുന്നവരുടെ എണ്ണവും കുറവല്ല. എ ഐ മനുഷ്യന്റെ ജോലികള് മുഴുവന് ഏറ്റെടുക്കുമോ എന്ന ആശങ്ക ഉയര്ന്നുകഴിഞ്ഞു. അതിനിടെയാണ് എഐയെ സംബന്ധിച്ചുളള മസ്കിന്റെ പ്രസ്താവന.