രംഗോലീ നിറങ്ങളുടെയും പടക്കങ്ങളുടെയും ആഘോഷമായ ദീപാവലിക്കുമേൽ അധികൃതർ കടിഞ്ഞാണിടുകയാണ്. അന്തരീക്ഷ മലിനീകരണം കൂടിവരുന്ന സാഹചര്യത്തിലാണ് പടക്കങ്ങള്‍ക്ക്‌ നിരോധനം ഏർപ്പെടുത്തുന്നത്. ഈ വർഷവും സുപ്രീംകോടതി ദീപാവലി ദിനത്തിൽ പടക്കങ്ങൾക്ക് നിരോധനമേർപ്പെടുത്തിയിട്ടുണ്ട്. ബേരിയവും മറ്റ് നിരോധിത രാസവസ്തുക്കളും ഉപയോഗിച്ച് നിർമ്മിച്ച പടക്കങ്ങള്‍ക്കാണ് നിരോധനം. അതോടെ സംസ്ഥാന സർക്കറുകളും ദീപാവലി ദിനത്തിൽ ഇളവുകൾ നൽകാൻ നിർബന്ധിതരായി.
സംസ്ഥാന സർക്കാറുകൾ പുറത്തിറക്കിയ നിയമങ്ങൾ
പഞ്ചാബ്: ഉത്സവ സീസണുകളിൽ 'ഹരിത പടക്കങ്ങൾ' മാത്രം വിൽക്കാനും വാങ്ങാനുമുളള അനുമതിയാണ് ഭഗവന്ത് മന്‍ സർക്കാർ നൽകിയിട്ടുളളത്. രാത്രി 8 മണി മുതൽ 10 മണി വരെയും ഗുരുപർവ്വിൽ ഭക്തർക്ക് പുലർച്ചെ 4 മുതൽ 5 വരെയുമാണ് പടക്കങ്ങൾ പൊട്ടിക്കാന്‍ അനുമതിയുളളതെന്ന് പരിസ്ഥിതി മന്ത്രി ഗുർമീത് സിംഗ് മീത് ഹയർ അറിയിച്ചു. ക്രിസ്മസ് തലേന്നും പുതുവർഷ രാവിലും രാത്രി 11.55 മുതൽ പുലർച്ചെ 12.30 വരെയാണ് പടക്കങ്ങൾക്ക് അനുമതിയുളളത്.
ഉത്തർപ്രദേശ്: വായു മലിനീകരണം അതിരൂക്ഷമായ ഡൽഹിയോട് ചേർന്നുള്ള നോയിഡയിലും ഗാസിയാബാദിലും പടക്കങ്ങൾ വാങ്ങുന്നതിനും വിൽക്കുന്നതിനും പൊലീസ് നിരോധനമേർപ്പെടുത്തി. എയർ ക്വാളിറ്റി ഇൻഡെക്സ് അനുകൂലമാണെങ്കിൽ മാത്രമേ ഹരിത പടക്കങ്ങളടക്കം വിൽക്കാൻ അനുമതി നൽകൂ എന്ന് സംസ്ഥാന സർക്കാരും അറിയിച്ചു.
ഡൽഹി: ഡൽഹിയിലെ വായുമലിനീകരണം കണക്കിലെടുത്ത് ഹരിത പടക്കങ്ങളടക്കം വിൽക്കാനും വാങ്ങാനും സൂക്ഷിക്കാനും പൊട്ടിക്കാനും അനുവദിക്കില്ലെന്ന് സർക്കാർ വ്യക്തമാക്കി. 2024 ജനുവരി 1 വരെയാണ് നിലവിൽ നിരോധനം ഏർപ്പെടുത്തിയിരിക്കുന്നത്. ശൈത്യകാലത്തെ വായുമലിനീകരണം മുന്നിൽ കണ്ടാണ് ഇത്തരം നടപടികൾ. അടുത്തിടെ 40 കിലോ പടക്കങ്ങളാണ് കോട്‌ല മുബാറക്പൂർ പ്രദേശത്ത് നിന്ന് പോലീസ് പിടിച്ചെടുത്തത്.
ജമ്മു കശ്മീർ: കശ്മീരിൽ അന്താരാഷ്ട്ര അതിർത്തിയുടെയും നിയന്ത്രിത മേഖലയുടെയും 5 കിലോമീറ്റർ ചുറ്റളവിൽ പടക്കങ്ങളുടെ വിൽപ്പനയും ഉപയോഗവും നിരോധിച്ചിരിക്കുകയാണ്.
തെലങ്കാന: ഹൈദരാബാദ് പൊലീസ് മേധാവി സന്ദീപ് സാൻഡില്യയുടെ ഉത്തരവനുസരിച്ച് ദീപാവലി ദിനത്തിൽ 2 മണിക്കൂർ മാത്രമാണ് പടക്കങ്ങൾ പൊട്ടിക്കാൻ അനുമതി. ശബ്ദ മലിനീകരണം കൂടി കണക്കിലെടുത്ത് നിയന്ത്രിത ശബ്ദമേ പടക്കങ്ങൾക്ക് പാടുള്ളൂ. ഇളവുകൾ നവംബർ 12 രാവിലെ 6 മണി മുതൽ നവംബർ 15 രാവിലെ 6 വരെയായിരിക്കും.
മഹാരാഷ്ട്ര: സംസ്ഥാനത്ത് പടക്കം പൊട്ടിക്കുന്നതിന് നിരോധനമില്ല. എന്നാൽ ബോംബൈ ഹൈക്കോടതിയുടെ ഉത്തരവിൽ ദീപാവലി ദിനത്തിൽ വൈകുന്നേരം 7 മുതൽ 10 വരെ പടക്കം പൊട്ടിക്കാമെന്ന് പരാമർശിക്കുന്നു.
തമിഴ്നാട്: ദീപാവലി ദിനത്തിൽ ഹരിത പടക്കങ്ങൾ പൊട്ടിക്കുന്നതിന് തമിഴ്നാട് സർക്കാർ അനുമതി നൽകി. പടക്കങ്ങളുടെ തലസ്ഥാനം എന്ന് അറിയപ്പെടുന്ന തമിഴ്നാട്ടിലെ ശിവകാശിയിലെ കമ്പനികള്‍ ബേരിയം ക്ലോറൈഡ് ഒഴിവാക്കി സുപ്രീംകോടതിയുടെ ഉത്തരവനുസരിച്ചുളള ഹരിത പടക്കങ്ങളാണ് നിർമ്മിക്കുന്നത്.
പശ്ചിമ ബംഗാള്‍: സംസ്ഥാന സർക്കാർ ഹരിത പടക്കങ്ങൾ ഉപയോഗിക്കുന്നതിന് നിയന്ത്രണങ്ങളോടെ അനുമതി നൽകി. ദീപാവലി ദിനത്തിൽ രാത്രി 8 മുതൽ 10 മണി വരെയും ഛത് പൂജ ദിനത്തിൽ രാവിലെ 6 മണി മുതൽ 8 മണി വരെയും ക്രിസ്തുമസ് പുതുവൽത്സര ദിനങ്ങളിൽ രാത്രി 11.55 മുതൽ 12:30 വരെയുമാണ് അനുമതി.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
