മദ്യം തൊണ്ടയിൽ നിന്ന് കൊവിഡ് വൈറസിനെ തുരത്തുമെന്ന് കോൺഗ്രസ് എംഎൽഎ. രാജസ്ഥാന്‍ നിയമസഭാംഗമായ ഭാരത് സിങ് കുന്ദന്‍പുരാണ് മദ്യം വൈറസിനെ ഇല്ലാതാക്കുമെന്നും അതിനാൽ മദ്യശാലകള്‍ തുറക്കണമെന്നും ആവശ്യപ്പെട്ടുകൊണ്ട് അദ്ദേഹം മുഖ്യമന്ത്രി അശോക് ഗെലോട്ടിന് കത്തെഴുതി. ലോക്ഡൗൺ കാരണം സംസ്ഥാന സർക്കാർ കടുത്ത സാമ്പത്തിക പ്രതിസന്ധിയിലായിരിക്കെ, അനധികൃത മദ്യവിൽപനക്കാർ നേട്ടമുണ്ടാക്കുകയാണെന്നും അദ്ദേഹം കത്തിൽ പറയുന്നു.
മദ്യവിൽപന ശാലകള്‍ വീണ്ടും തുറക്കുന്നത് മദ്യപാനികള്‍ വ്യാജ മദ്യപാനം മൂലം മരിക്കുന്നതിൽ നിന്ന് രക്ഷിക്കുക മാത്രമല്ല, ലോക്ക്ഡ ഡൌണ്‍ സമ്പദ്‌വ്യവസ്ഥയെ സാരമായി ബാധിച്ച സാഹചര്യം കൂടി കണക്കിലെടുക്കുമ്പോള്‍ സംസ്ഥാനത്തിന് ആവശ്യമായ വരുമാനം നേടുകയും ചെയ്യാം എന്നും ഭാരത് സിങ് പറയുന്നു. കോൺഗ്രസ് എം‌എൽ‌എയുടെ ആവശ്യത്തെ സി‌പി‌ഐ-എം എംഎൽഎ ബൽ‌വാൻ സിംഗ് പുനിയ പിന്തുണക്കുകയും ചെയ്തു. ഇതേ കാര്യം ആവശ്യപ്പെട്ടുകൊണ്ട് അദ്ദേഹവും ഗെലോട്ടിന് കത്തെഴുതിയിരുന്നു.
അതേസമയം, രാജസ്ഥാനിൽ മൂന്ന് കൊറോണ വൈറസ് മരണങ്ങൾ കൂടി രേഖപ്പെടുത്തി. 33 പുതിയ വൈറസ് കേസുകൾ റിപ്പോർട്ട് ചെയ്തു. ജയ്പൂരിൽ രണ്ട് പേരും നാഗൗറിലെ ഒരാളുമാണ് മരിച്ചതെന്ന് അഡീഷണൽ ചീഫ് സെക്രട്ടറി രോഹിത് കുമാർ സിംഗ് പറഞ്ഞു. സംസ്ഥാനത്ത് വൈറസ് മൂലം മരിച്ചവരുടെ എണ്ണം അതോടെ 61 ആയി ഉയർന്നു. ജയ്പൂരിൽ മാത്രം 34 പേർ മരിച്ചു.
