ശ്രീ നഗര് : രാജ്യം കൊറോണയെ നേരിടുന്ന ഘട്ടത്തില് രോഗം പടരാത്തിരിക്കാനുള്ള മുന് കരുതലിനാണ് പ്രാധാന്യം നല്കേണ്ടതെന്നും അതിനായി കാശ്മീരില് ഇന്റര്നെറ്റ് സൗകര്യം ഉടന് പുനസ്ഥാപിക്കണമെന്നും വീട്ടു തടങ്കലില് നിന്ന് മോചിതനായ ജമ്മുകാശ്മീര് മുന് മുഖ്യമന്ത്രി ഒമര് അബ്ദുള്ള ആവശ്യപ്പെട്ടു. വൈറസ് വ്യാപനം മുന്കൂട്ടിക്കണ്ട് തടങ്കലില് നിന്ന് ഇനിയും മോചിപ്പിക്കപ്പെടാത്ത മുഴുവന് കാശ്മീരി നേതാക്കളെയും മോചിപ്പിക്കണമെന്നും ഒമര് അബ്ദുള്ള ആവശ്യപ്പെട്ടു. മാധ്യമങ്ങളോട് പ്രതികരിക്കുകയായിരുന്നു ഒമര്.
ആര്ട്ടിക്ള് 370 - നെ കുറിച്ചും ജമ്മുകാശ്മീരിന്റെ പ്രത്യേക പദവി റദ്ദാക്കിയതിനെ കുറിച്ചുമൊക്കെ പിന്നീടു പ്രതികരിക്കാമെന്നും മാധ്യമ പ്രവര്ത്തകരുടെ ചോദ്യങ്ങള്ക്ക് മറുപടിയായി ഒമര് അബ്ദുള്ള പറഞ്ഞു. നാമിപ്പോള് കൊറോണ വൈറസിനെതിരെ ജീവന് മരണപ്പോരാട്ടമാണ് നടത്തിക്കൊണ്ടിരിക്കുന്നത്. തടങ്കലിലാക്കപ്പെട്ട ദിവസത്തില് നിന്ന് വളരെ മാറിയ ലോകമാണ് തനിക്കിപ്പോള് കാണാന് കഴിയുന്നത് എന്നും അദ്ദേഹം പറഞ്ഞു.