ഡല്‍ഹി: ഉത്തര്‍പ്രദേശില്‍ ഓക്‌സിജന്‍ ക്ഷാമമില്ലെന്ന മുഖ്യമന്ത്രി യോഗി ആദിത്യനാഥിന്റെ പരാമര്‍ശത്തിനെതിരെ കോണ്‍ഗ്രസ് നേതാവ് പ്രിയങ്കാ ഗാന്ധി. 'മുഖ്യമന്ത്രീ, ഉത്തര്‍പ്രദേശില്‍ ഓക്‌സിജന്‍ അടിയന്തരാവസ്ഥയുണ്ട്. നിങ്ങള്‍ക്ക് എന്റെ മേല്‍ കേസെടുക്കുകയോ എന്റെ സ്വത്ത് കണ്ടുകെട്ടുകയോ ചെയ്യാം. എന്നാല്‍ ദൈവത്തെയോര്‍ത്ത് സാഹചര്യം മനസിലാക്കി ജനങ്ങളുടെ ജീവന്‍ രക്ഷിക്കാനുളള പ്രവര്‍ത്തനങ്ങള്‍ ഉടന്‍ ആരംഭിക്കണം' - പ്രിയങ്ക ട്വീറ്റ് ചെയ്തു.
ഓക്‌സിജന്‍ കുറവാണ് അതുകൊണ്ട് രോഗിയെ ഇവിടെ അഡ്മിറ്റ് ചെയ്യാനാവില്ലെന്ന് നിങ്ങളോട് പറയുന്ന ഒരവസ്ഥയില്‍ നിങ്ങളെ സങ്കല്‍പ്പിച്ചുനോക്കു. തീരെ വിവേകമില്ലാത്ത ഒരു സര്‍ക്കാരിന് മാത്രമേ ഇത്തരത്തിലൊരു പ്രസ്താവന ഇറക്കാന്‍ സാധിക്കുകയുളളുവെന്നും പ്രിയങ്ക പറഞ്ഞു.
ഉത്തര്‍പ്രദേശില്‍ ഓക്‌സിജന്‍ ക്ഷാമമില്ല എന്നായിരുന്നു യോഗി ആദിത്യനാഥിന്റെ അവകാശവാദം. ക്ഷാമത്തെക്കുറിച്ച് അഭ്യൂഹങ്ങള്‍ പരത്തുന്നവര്‍ക്കെതിരെ കേസെടുക്കുകയും അവരുടെ സ്വത്തുക്കള്‍ കണ്ടുകെട്ടുകയും ചെയ്യുമെന്ന് അദ്ദേഹം പറഞ്ഞിരുന്നു. എന്നാല്‍, സംസ്ഥാനത്ത് ഓക്‌സിജന്‍ അടിയന്തരമായി ആവശ്യമുണ്ടെന്ന് യോഗിയുടെ പ്രസ്താവനയെ കുറിച്ചുള്ള റിപ്പോര്‍ട്ട് ടാഗ് ചെയ്ത് പ്രിയങ്ക കൂട്ടിച്ചേര്‍ത്തു.
