മുബൈ: മഹാരാഷ്ട്രയില്‍ കൊവിഡ് ആശുപത്രിയില്‍ തീ പിടിച്ച് 13 രോഗികള്‍ വെന്തുമരിച്ചു. തലസ്ഥാന നഗരിയായ മുബൈയില്‍ നിന്ന് 70 കിലോമീറ്റര്‍ അകലെ വിരാറിലെ വിജയ്‌ വല്ലഭ് ആശുപത്രിയിലാണ് ദാരുണ സംഭവം ഉണ്ടായത്. ഇന്ന് (വെള്ളിയാഴ്ച) പുലര്‍ച്ചെ മൂന്നുമണിയോടെയാണ് അപകടമുണ്ടായത്. മരണപ്പെട്ടവര്‍ മുഴുവന്‍ തീവ്ര പരിചരണ വിഭാഗത്തില്‍ കഴിയുന്നവരാണ് എന്നാണു വിവരം. തീപിടുത്തത്തിനുള്ള കാരണം വ്യക്തമല്ല.
കൊവിഡ് രോഗികള്‍ക്ക് മാത്രം ചികിത്സ നല്‍കിയിരുന്ന ആശുപത്രിയില്‍ സംഭവ സമയത്ത് 90 രോഗികള്‍ ഉണ്ടായിരുന്നതായി ആശുപത്രി സി ഇ ഒ ദിലീപ് ഷാ പറഞ്ഞു. ആശുപത്രിയിലെ ജീവനക്കാരും നഴ്സുമാരും ഡോക്ടര്‍മാരും രോഗികളുടെ കൂട്ടിരിപ്പുകാരും ചേര്‍ന്ന് അടിയന്തിരമായി ഇടപെട്ടാണ് രക്ഷാപ്രവര്‍ത്തനം നടത്തിയത്. മറ്റ് രോഗികളെ സുരക്ഷിതമായി അടുത്ത ആശുപത്രികളിലേക്ക് മാറ്റിയതായി ആശുപത്രി അധികൃതരെ ഉദ്ധരിച്ച് വാര്‍ത്താ എജന്‍സികള്‍ റിപ്പോര്‍ട്ട് ചെയ്തു.
സംഭവത്തില്‍ അടിയന്തിര അന്വേഷണത്തിന് ഉത്തരവിട്ട മഹാരാഷ്ട്രാ മുഖ്യമന്ത്രി ഉദ്ധവ് താക്കറെ ആശുപത്രി അധികൃതരുമായി ടെലഫോണില്‍ സംസാരിച്ചു. തീവ്ര പരിചരണ വിഭാഗത്തില്‍ കിടക്കുന്ന രോഗികളുടെ ദാരുണാന്ത്യത്തില്‍ സംഭവത്തില്‍ പ്രധാനമന്ത്രി നരേന്ദ്ര മോദി അനുശോചിച്ചു.
