ജെറുസലേം: ഇസ്രായേലില്‍ സര്‍ക്കാര്‍ രൂപീകരിക്കാന്‍ ബെഞ്ചമിന്‍ നെതന്യാഹുവിനോട് ആവശ്യപ്പെട്ട് ഇസ്രായേല്‍ പ്രസിഡന്റ് റുവന്‍ റിവിലിന്‍. നെതന്യാഹുവിനെതിരായ അഴിമതി ആരോപണങ്ങളുടെ വിചാരണ നടക്കുന്നതിനിടെയാണ് സര്‍ക്കാര്‍ രൂപീകരിക്കാന്‍ പ്രസിഡന്റിന്റെ ക്ഷണം. 120 അംഗ പാര്‍ലമെന്റില്‍ സര്‍ക്കാര്‍ രൂപീകരിക്കാന്‍ 61 അംഗങ്ങളുടെ പിന്തുണയാണ് ആവശ്യം. സര്‍ക്കാരുണ്ടാക്കാന്‍ നെതന്യാഹുവിന് സാധിക്കുമെന്നും അതിനാലാണ് അദ്ദേഹത്തോട് ആവശ്യപ്പെടുന്നതെന്നും പ്രസിഡന്റ് പറഞ്ഞു.
നെതന്യാഹുവിനെ പ്രധാനമന്ത്രിയാക്കുന്നതില്‍ നിന്ന് തടയാന്‍ നിയമത്തില്‍ ഒന്നും തന്നെയില്ലെന്നും പുതുതായി തെരഞ്ഞെടുക്കപ്പെട്ട പാര്‍ലമെന്റിലെ 13 പാര്‍ട്ടികളോടും കൂടിയാലോചിച്ച ശേഷമാണ് തീരുമാനമെന്നും റിവിലിന്‍ പറഞ്ഞു. എന്നാല്‍, നെതന്യാഹുവിന് 52 അംഗങ്ങളുടെ പിന്തുണയാണുള്ളത്. അതേസമയം പ്രതിപക്ഷ നേതാവ് യായിര്‍ ലാപിഡിന് 45 അംഗങ്ങളുടെ പിന്തുണയാണുളളത്. എഴ് പേര്‍ നഫ്തലി ബെനറ്റിന്റെ യാമിന പാര്‍ട്ടിയെ പിന്തുണയ്ക്കുന്നവരാണ്. 16 അംഗങ്ങള്‍ നിലവില്‍ ആര്‍ക്കും പിന്തുണ പ്രഖ്യാപിച്ചിട്ടില്ല.
ഇസ്രായേലില്‍ ഒരു വര്‍ഷത്തിനിടെ നടക്കുന്ന മൂന്നാമത്തെ തെരഞ്ഞെടുപ്പാണ് ഇത്. ഇത്തവണയും സര്‍ക്കാര്‍ രൂപീകരിക്കാനായില്ലെങ്കില്‍ വീണ്ടും തെരഞ്ഞെടുപ്പ് നടത്തേണ്ടി വരും.
