ചെന്നൈ: കോയമ്പത്തൂര്‍ സൗത്ത് മണ്ഡലത്തില്‍ വോട്ട് ചെയ്യാനായി രാഷ്ട്രീയപാര്‍ട്ടികള്‍ ജനങ്ങള്‍ക്ക് വന്‍ തോതില്‍ പണം വിതരണം ചെയ്യുന്നുണ്ടെന്ന് മക്കള്‍ നീതി മയ്യം സ്ഥാപകന്‍ കമല്‍ ഹാസന്‍. ഇതിനെതിരെ നടപടിയെടുക്കണമെന്ന് കമല്‍ ഹാസന്‍ തെരഞ്ഞെടുപ്പ് കമ്മീഷനോട് ആവശ്യപ്പെട്ടിട്ടുണ്ട്. തെരഞ്ഞെടുപ്പില്‍ കൃത്രിമത്വം നടന്നതിന്റെ തെളിവുകള്‍ തന്റെ കൈയ്യിലുണ്ടെന്നും കമല്‍ ഹാസന്‍ പറഞ്ഞു.
ചില ബൂത്തുകളില്‍ പ്രശ്‌നങ്ങളുണ്ട്. എന്നാല്‍ പ്രധാന പരാതി ഇന്നലെ രാത്രി മുതല്‍ മണ്ഡലത്തില്‍ വ്യാപകമായി എല്ലാവര്‍ക്കും സൗജന്യമായി പണം വിതരണം ചെയ്യുന്നുണ്ട് എന്നതാണ്. വളരെ വക്രതയോടെയും വേഗത്തിലുമാണ് അവരത് ചെയ്യുന്നത്- കമല്‍ ഹാസന്‍ പറഞ്ഞു.
മക്കളായ ശ്രുതി ഹാസന്‍, അക്ഷര ഹസന്‍ എന്നിവരോടൊപ്പമാണ് കമല്‍ ഹാസന്‍ വോട്ട് രേഖപ്പെടുത്താനെത്തിയത്. മഹിളാ മോര്‍ച്ച ദേശീയ പ്രസിഡന്റ് വാനതി ശ്രീനിവാസന്‍, കോണ്‍ഗ്രസ് സംസ്ഥാന വര്‍ക്കിംഗ് പ്രസിഡന്റ് മയൂര ജയകുമാര്‍ എന്നിവരാണ് കോയമ്പത്തൂര്‍ സൗത്തില്‍ കമല്‍ ഹാസന്റെ എതിരാളികള്‍.
