അക്ഷയ് കുമാർ നായകനായ രാം സേതു സിനിമാ സെറ്റിലെ അമ്പതോളം പേർക്ക് കൊവിഡ് സ്ഥിരീകരിച്ചു. ഷൂട്ടിംഗ് ആരംഭിക്കുന്നതിന് മുന്നോടിയായി നടത്തിയ പരിശോധനയിലാണ് ഇത്രയും ആളുകൾക്ക് കൊവിഡ് കണ്ടെത്തിയത്. രോഗം സ്ഥിരീകരിച്ചവരിൽ അക്ഷയ് കുമാറും ഉൾപ്പെടും. 100 ഓളം പേരിലാണ് കൊവിഡ് പരിശോധന നടത്തിയത്. ഷൂട്ടിംഗ് പൂർണമായും നിർത്തിവെച്ചു. ഷൂട്ടിംഗ് സെറ്റിലെ മുഴുവൻ ആളുകളോടും ക്വാറന്റൈനിൽ പോകാൻ ആവശ്യപ്പെട്ടിട്ടുണ്ട്. അക്ഷയ് കുമാറിനെ മുംബൈയിലെ സ്വകാര്യ ആശുപത്രിയിൽ പ്രവേശിപ്പിച്ചു. അക്ഷയുടെ ആരോഗ്യ നില തൃപ്തികരമാണ്. ഉടൻ തന്നെ ആശുപത്രിവിടുമെന്ന് അദ്ദേഹം ട്വിറ്ററിലൂടെ അറിയിച്ചു.
അഭിഷേക് ശർമയാണ് രാം സേതുവിന്റെ സംവിധായകൻ. നുസ്രറത്ത് ബറൂച്ച. ജാക്വലിൻ ഫെർണാണ്ടസ്, എന്നിവരും ചിത്രത്തിൽ അഭിനയിക്കുന്നുണ്ട്. രാം സേതു പാലത്തിന്റെ യാഥാർത്ഥ്യങ്ങൾ അന്വേഷിക്കുന്ന ചരിത്ര ഗവേഷകന്റെ റോളിലാണ് അക്ഷയ് കുമാർ അഭിനയിക്കുന്നത്. കൊവിഡിനെ തുടർന്ന് ബോളിവുഡിൽ ചിത്രങ്ങളുടെ ഷൂട്ടിംഗ് കനത്ത പ്രതിസന്ധിയാണ് നേരിടുന്നത്.
രാജ്യത്ത് കൊവിഡ് കേസുകൾ ഏറ്റവും കൂടുതൽ റിപ്പോർട്ട് ചെയ്യുന്നത് മഹാരാഷ്ട്രയിലാണ്. സംസ്ഥാനത്ത് അരലക്ഷത്തിലധികം കൊവിഡ് കേസുകളാണ് കഴിഞ്ഞ 24 മണിക്കൂറിനിടെ റിപ്പോർട്ട് ചെയ്തത്.
