കണ്ണൂര്: കമ്മ്യൂണിസ്റ്റുകാര് വ്യക്തിപൂജയില് അഭിരമിക്കുന്നവരല്ലെന്ന് സിപിഐഎം സംസ്ഥാന കമ്മിറ്റി അംഗം പി ജയരാജന്. പിണറായി വിജയനെ ക്യാപ്റ്റനെന്നു വിളിക്കുന്നതിലെ പ്രതികരണം ഫേസ്ബുക്കിലാണ് അദ്ദേഹം പങ്കുവച്ചത്.. ജനങ്ങളോട് ചേര്ന്നു നില്ക്കുമ്പോള് സ്നേഹസൂചകമായി അവര് പല തരത്തിലും ഇഷ്ടം പ്രകടിപ്പിക്കും. ചിലര് പാട്ടെഴുതിയും ഫോട്ടോ വച്ചും ടാറ്റു ചെയ്തും ഇഷ്ടം പ്രകടിപ്പിക്കും. എന്നാല് കമ്മ്യൂണിസ്റ്റുകാര് വ്യക്തി പൂജയില് അഭിരമിക്കുന്നവരല്ല. സഖാവ് കോടിയേരി മാധ്യമപ്രവര്ത്തകരുടെ ചോദ്യത്തിന് മറുപടി പറഞ്ഞതുപോലെ ഈ പാര്ട്ടിയില് എല്ലാവരും 'സഖാക്കളാണ്'. അതുകൊണ്ട് വലതുപക്ഷവും മാധ്യമങ്ങളും മുഖ്യമന്ത്രിക്ക് കിട്ടുന്ന ജനപിന്തുണയില് വല്ലാതെ അസ്വസ്തരായിട്ട് കാര്യമില്ല. വ്യക്തികളല്ല പാര്ട്ടിയും ഇടതുപക്ഷവുമാണ് ജനങ്ങളുടെ ഉറപ്പ്- പി ജയരാജന് കുറിച്ചു.
പാര്ട്ടിയില് ക്യാപ്റ്റനില്ല സഖാവ് മാത്രമാണുളളത്, പാര്ട്ടി ആര്ക്കും ക്യാപ്റ്റന് എന്ന വിശേഷണം നല്കിയിട്ടില്ല. വ്യക്തികള് നല്കുന്ന വിശേഷണം മാത്രമാണതെന്ന് സിപിഎം പോളിറ്റ് ബ്യൂറോ അംഗം കോടിയേരി ബാലകൃഷ്ണന് അഭിപ്രായപ്പെട്ടിരുന്നു.
ആളുകളുടെ താല്പ്പര്യത്തിനനുസരിച്ച് പലതും വിളിക്കും, തന്നെ ക്യാപ്റ്റന് എന്നു വിളിക്കുന്നതില് ആശയക്കുഴപ്പമുണ്ടാക്കാന് ശ്രമിക്കേണ്ടെന്നായിരുന്നു വിഷയത്തില് മുഖ്യമന്ത്രിയുടെ പ്രതികരണം.