ഡെറാഡൂണ്‍: ഉത്തരാഖണ്ഡ് മുഖ്യമന്ത്രി ത്രിവേന്ദ്രസിംഗ് രാജിവെച്ചു. അടുത്തവര്‍ഷം നിയമസഭാ തെരഞ്ഞെടുപ്പ് നടക്കാനിരിക്കെ പാര്‍ട്ടിയിലുണ്ടായ വിമത നീക്കത്തെ തുടര്‍ന്നാണ് ത്രിവേന്ദ്രസിംഗ് റാവത്തിന്റെ രാജി. അധികാരത്തിലെത്തി നാല് വര്‍ഷം തികയാനിരിക്കെയാണ് രാജി. ഗുജറാത്ത് മുഖ്യമന്ത്രി ആനന്ദി ബെന്‍ പട്ടേലിനു ശേഷം കാലാവധി കഴിയുന്നതിനുമുന്‍പേ രാജി വയ്ക്കുന്ന ബിജെപി മുഖ്യമന്ത്രികൂടിയാണ് ത്രിവേന്ദ്രസിംഗ് റാവത്ത്. അജയ് ഭട്ട്, ധന്‍സിംഗ് റാവത്ത്, അനില്‍ ബലൂണി എന്നിവരുടെ പേരുകളാണ് മുഖ്യമന്ത്രി സ്ഥാനത്തേക്ക് വിമതര്‍ മുന്നോട്ടുവെച്ചത്.
ത്രിവേന്ദ്ര സിംഗ് റാവത്തിനെതിരെ ബിജെപിയിലെ തന്നെ ഒരു വിഭാഗം എംഎല്‍എമാര്‍ തിരിഞ്ഞതോടെയാണ് നാടകീയ സംഭവങ്ങള്‍ക്ക് തുടക്കമായത്. പത്തോളം എംഎല്‍എമാരാണ് മുഖ്യമന്ത്രിയെ മാറ്റണമെന്ന ആവശ്യവുമായി ഡല്‍ഹിയില്‍ ക്യാമ്പ് ചെയ്തിരുന്നത്. മുഖ്യമന്ത്രിക്ക് ജനപിന്തുണ നഷ്ടമായെന്നും മുഖ്യമന്ത്രിയെ മാറ്റിയില്ലെങ്കില്‍ ബിജെപി വിടുമെന്നുമായിരുന്നു നേതാക്കളുടെ ഭീഷണി.
