ഡല്ഹി: സമരഭൂമിയിലെ ഇന്റര്നെറ്റ് വിച്ഛേദനമുള്പ്പെടെയുളള കേന്ദ്രസര്ക്കാരിന്റെ ജനദ്രോഹനടപടികളില് പ്രതിഷേധിച്ച് സംയുക്ത കിസാന് മോര്ച്ച ആഹ്വാനം ചെയ്ത രാജ്യവ്യാപക റോഡ് ഉപരോധം ഇന്ന്. ഉച്ചയ്ക്ക് പന്ത്രണ്ട് മണി മുതല് രണ്ടു മണിവരെയാണ് ഉപരോധം. ദേശീയ തലസ്ഥാനത്ത് തടസങ്ങളൊന്നും ഉണ്ടാകില്ലെന്നും ആംബുലന്സ്, സ്കൂള് ബസുകള് തുടങ്ങി അവശ്യ സര്വീസുകളെ തടയില്ലെന്നും കര്ഷകര് വ്യക്തമാക്കി. റോഡ് ഉപരോധത്തില് കുടുങ്ങുന്നവര്ക്ക് ഭക്ഷണം നല്കുമെന്നും സമരസമിതി അറിയിച്ചു.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
റോഡ് ഉപരോധിച്ചുകൊണ്ട് സമരം ചെയ്യാന് അനുവാദം നല്കിയിട്ടില്ലെന്നും നഗരത്തിലെ ഗതാഗതവും ക്രമസമാധാനവും തടസപ്പെടുത്തുന്നവര്ക്കെതിരെ കര്ശന നടപടിയെടുക്കുമെന്നും ഡല്ഹി പോലീസ് വ്യക്തമാക്കി. മുളളുവേലികള്, കോണ്ക്രീറ്റ് ഭിത്തികള്, ബാരിക്കേഡുകള് തുടങ്ങിയവയുപയോഗിച്ച് സിംഘു തിക്രി അതിര്ത്തികളില് സുരക്ഷ ശക്തമാക്കിയിട്ടുണ്ട്. റാപ്പിഡ് ആക്ഷന് ഫോഴ്സ്, സിആര്പിഎഫ്, സെന്ട്രല് ഇന്ഡസ്ട്രിയല് ഫോഴ്സ് തുടങ്ങിയ അര്ദ്ധ സൈനിക വിഭാഗത്തിലെ 15,000 ഉദ്യോഗസ്ഥരെ സമരഭുമിയിലേക്ക് വിന്യസിച്ചിട്ടുണ്ട്. അതേസമയം കേരളത്തില് റോഡ് തടയില്ല, മാര്ച്ചും ധര്ണയും സംഘടിപ്പിക്കുമെന്ന് സംഘടനകള് വ്യക്തമാക്കി.