ഡല്‍ഹി: കാര്‍ഷിക നിയമങ്ങള്‍ക്കെതിരെ പ്രതിഷേധിക്കുന്ന കര്‍ഷകര്‍ക്ക് ഐക്യദാര്‍ഢ്യം പ്രഖ്യാപിച്ച് പാര്‍ട്ടിയില്‍ നിന്ന് രാജിവെച്ച് ബിജെപി നേതാവ്. ഹരിയാന ബിജെപി നേതാവും മുന്‍ എംഎല്‍എയുമായ ബല്‍വാന്‍ സിംഗ് ദൗലത് പുരിയയാണ് ബിജെപി വിട്ടത്. ഇന്ത്യന്‍ നാഷണല്‍ ലോക്ദളില്‍ നിന്ന് രാജി വച്ച് 2019 തെരഞ്ഞെടുപ്പിന് മുന്നോടിയായാണ് ബല്‍വാന്‍ സിംഗ് ബിജെപിയില്‍ അംഗമായത്.
തന്റെ ഗ്രാമത്തില്‍ നടന്ന പഞ്ചായത്ത് യോഗത്തില്‍ നിയമത്തിനെതിരെ പ്രതിഷേധിക്കുന്ന കര്‍ഷകരെ പിന്തുണച്ച് താന്‍ മുന്നോട്ടുവരണമെന്ന നിര്‍ദേശങ്ങളുയര്‍ന്നിരുന്നു. അതിനാല്‍ പാര്‍ട്ടി ഉപേക്ഷിക്കാനുളള തീരുമാനത്തിലെത്തുകയായിരുന്നു. നിയമങ്ങള്‍ക്കെതിരായി കര്‍ഷകര്‍ക്കൊപ്പം തിക്രി അതിര്‍ത്തിയിലെത്തി പ്രതിഷേധിക്കുമെന്നും ഫത്തേഹാബാദ് മുന്‍ എംഎല്‍എ പറഞ്ഞു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
മൂന്ന് കാര്‍ഷികനിയമങ്ങളും കര്‍ഷകര്‍ക്കെതിരാണെന്നും അവ എത്രയും പെട്ടെന്ന് പിന്‍വലിക്കണമെന്നും ബല്‍വാന്‍ സിംഗ് ആവശ്യപ്പെട്ടു. കഴിഞ്ഞ ദിവസം ഹരിയാനയില്‍ നിന്നുളള ബിജെപി നേതാവും മുന്‍ പാര്‍ലമെന്ററി സെക്രട്ടറിയുമായ രാംപാല്‍ മജ്‌റയും ബിജെപി നേതാവ് ശ്യാം സിംഗ് റാണയും പാര്‍ട്ടിയില്‍ നിന്ന് രാജി വച്ചിരുന്നു.
