കെപിസിസി പ്രസിഡന്റാകാൻ താൽപര്യം ഉണ്ടെന്ന് കെ സുധാകരൻ എംപി. ഡൽഹിയിൽ എത്താൻ ഹൈക്കമാന്റ് ആവശ്യപ്പെട്ടിട്ടുണ്ടെന്ന് സുധാകരൻ കണ്ണൂരിൽ മാധ്യമങ്ങളോട് പറഞ്ഞു. എന്നാൽ കെപിസിസി പ്രസിഡന്റ് സ്ഥാനം സംബന്ധിച്ച് ഔദ്യോഗിക അറിയിപ്പുകളൊന്നും ലഭിച്ചിട്ടിലെന്നും അദ്ദേഹം വ്യക്തമാക്കി.
കെപിസിസി പ്രസിഡന്റിന്റെ ചുമതല നൽകിയേക്കും എന്ന വാർത്തയോട് പ്രതികരിക്കുകയായിരുന്നു അദ്ദേഹം. കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ നിയമസഭാ തെരഞ്ഞെടുപ്പിൽ മത്സരിക്കാൻ ഒരുങ്ങുന്ന സാഹചര്യത്തിലാണ് സുധാകരന് ചുമതല നൽകുന്നതിനെ കുറിച്ച് ആലോചിക്കുന്നത്. സ്ഥാനാർത്ഥി നിർണയം തുടങ്ങുന്ന ഘട്ടത്തിൽ ഇതിനെ കുറിച്ച് അന്തിമ തീരുമാനം എടുക്കും. കോൺഗ്രസ് ഹൈക്കമാന്റാണ് ഇത് സംബന്ധിച്ച് ആലോചന നടത്തുന്നത്. എകെ ആന്റണിയുടെ പിന്തുണയോടെ ഹൈക്കമാന്റിൽ പുതിയ നീക്കം നടക്കുന്നത്.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
മുല്ലപ്പള്ളി രാമചന്ദ്രന് നിയമസഭാ തെരഞ്ഞെടുപ്പിൽ മത്സരിക്കാൻ ഹൈക്കമാന്റ് അനുമതി നൽകിയിരുന്നു. മത്സരിക്കാനുള്ള താൽപര്യം മുല്ലപ്പള്ളി ഹൈക്കമാന്റിനെ അറിയിച്ചിരുന്നു. പ്രദേശ് കോൺഗ്രസ് പ്രസിഡന്റായിരിക്കെ മത്സരിക്കാൻ തടസമില്ലെന്നാണ് ഹൈക്കമാന്റിന്റെ നിലപാട്. കൽപ്പറ്റയിലോ കൊയിലാണ്ടിയിലോ ആണ് മുല്ലപ്പള്ളിക്ക് മത്സരിക്കാൻ താൽപര്യം. അതേസമയം മത്സരിക്കുകയാണെങ്കിൽ കെപിസിസി പ്രസിഡന്റ് സ്ഥാനത്തുനിന്നും മാറിനിൽക്കേണ്ടി വരുമെന്ന് ഹൈക്കമാന്റ് അറിയിച്ചിരുന്നില്ല. അതേ സമയം നിയമസഭാ തെരഞ്ഞെടുപ്പിൽ മത്സരിക്കുമെന്ന റിപ്പോർട്ട് മുല്ലപ്പള്ളി നിഷേധിച്ചില്ല. പാർട്ടി ആവശ്യപ്പെട്ടാൽ ഏത് സ്ഥാനവും ഏറ്റെടുക്കുമെന്ന് കെ സുധാകരൻ നേരത്തെ വ്യക്തമാക്കിയിരുന്നു.