ഭോപ്പാല്: സ്റ്റാന്ഡ്അപ്പ് കൊമേഡിയന് മുനവര് ഫറൂഖിയുടെ റിമാന്ഡ് കാലാവധി നീട്ടി. ജനുവരി ആറിന് മുനവറിന്റെ ജാമ്യാപേക്ഷ ഇന്ഡോര് കോടതി നിരസിച്ചിരുന്നു. ജനുവരി ഒന്നിന് അറസ്റ്റിലായ മുനവര് ഫറൂഖി 27 വരെ പോലീസ് കസ്റ്റഡിയില് കഴിയേണ്ടിവരും. കേസില് വെളളിയാഴ്ച്ചയാണ് ഹൈക്കോടതി വാദം കേള്ക്കുക.
ബിജെപി എംഎല്എ മാലിനി ഗൗഡിന്റെ മകന് ഏക്ലവ്യ ഗൗഡിന്റെ പരാതിയിലാണ് മുനവര് ഫറൂഖിയുള്പ്പെടെ അഞ്ച് സ്റ്റാന്ഡ്അപ്പ് കൊമേഡിയന്മാരെ അറസ്റ്റ് ചെയ്തത്. പുതുവത്സരാഘോഷങ്ങളുടെ ഭാഗമായി ഇന്ഡോറില് നടന്ന പരിപാടിയില് ഹിന്ദു ദൈവങ്ങള്ക്കെതിരെ ആക്ഷേപകരമായ പരാമര്ശങ്ങള് നടത്തി, മതവികാരം വ്രണപ്പെടുത്തി എന്നാണ് മുനവര് ഫറൂഖിക്കും സംഘത്തിനുമെതിരായ ആരോപണങ്ങള്. എന്നാല്, മുനവര് അടക്കമുള്ളവര് ഹിന്ദു ദൈവങ്ങള്ക്കെതിരായി പരാമര്ശം നടത്തി എന്നതിന് വീഡിയോ തെളിവുകളൊന്നുമില്ല.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
മുനവറിനെക്കൂടാതെ നലിന് യാദവ്, എഡ്വിന് ആന്റണി, പ്രകാര് വ്യാസ്, പ്രിയം വ്യാസ് എന്നിവരാണ് അറസ്റ്റിലായത്. മതവികാരം വ്രണപ്പെടുത്തുക, കൊവിഡ് മാനദണ്ഡങ്ങള് ലംഘിക്കുക തുടങ്ങി ഇന്ത്യന് പീനല് കോഡിലെ 295എ, 298, 269, 118 തുടങ്ങിയ വകുപ്പുകള് ഉള്പ്പെടുത്തിയാണ് അഞ്ചുപേരെയും അറസ്റ്റ് ചെയ്തത്.