ലോസ് ആഞ്ജലോസ്: ലോകത്തെയാകെ ഭീതിയിലാഴ്ത്തിയ കൊറോണയെ തുടര്ന്ന് അമേരിക്കയില് ഒരു മരണം റിപ്പോര്ട്ട് ചെയ്തു. വാഷിംഗ്ടണ് കിംഗ് കൌണ്ടി പ്രദേശത്തുകാരനാണ് മരണപ്പെട്ടത് എന്ന് അമേരിക്കന് ആരോഗ്യ മന്ത്രാലയം പുറത്തുവിട്ട വാര്ത്താ ബുള്ളറ്റിന് വ്യക്തമാക്കി. അമേരിക്കയില് വിവിധ പ്രവിശ്യകളില് ഇതിനകം കൊറോണ (കോവിഡ്-19) റിപ്പോര്ട്ട് ചെയ്തതായി ആരോഗ്യ മന്ത്രാലയം അറിയിച്ചു. കാലിഫോര്ണിയ, ഒറിഗോണ് എന്നീ പ്രവിശ്യകളിലെ ആശുപത്രികളില് സംശയം തോന്നിയവരെ നിരീക്ഷണത്തില് വെച്ചതായാണ് റിപ്പോര്ട്ട്.
ദക്ഷിണ കൊറിയ, ഇറാന് എന്നിവിടങ്ങളിലാണ് ചൈനക്ക് പുറമെ ഇപ്പോള് കൊറോണ രോഗികളുടെ എണ്ണത്തില് വന് വര്ധനവ് രേഖപ്പെടുത്തിയത്. ദക്ഷിണ കൊറിയയില് മാത്രം 1200-ലധികം ആളുകള് ഇപ്പോള് ചികിത്സയിലുണ്ട്. അന്റാര്ട്ടിക്ക ഉള്പ്പെടെ എല്ലാ ഭൂഖണ്ഡങ്ങളിലുമായി 81,700-ത്തോളം പേരാണ് കൊറോണ ചികിത്സയിലുള്ളത്. 2,800-ലധികം ആളുകള് മരണപ്പെട്ടിട്ടുണ്ട്.
ചൈനനയില് റിപ്പോര്ട്ട് ചെയ്യപ്പെടുന്നതിനെക്കാള് കൂടുതല് മറ്റു രാജ്യങ്ങളില് രോഗം റിപ്പോര്ട്ട് ചെയ്യപ്പെടുന്നത് വലിയ ആശങ്കയാണ് ഉണ്ടാക്കിയിട്ടുള്ളത്. മഹാമാരിയായി പ്രഖ്യാപിക്കാനുള്ള സാധ്യത തള്ളിക്കളയാനാവില്ലെന്ന് കഴിഞ്ഞ ദിവസം ലോകാരോഗ്യ സംഘടന (ഡബ്ല്യു.എച്ച്.ഒ) വ്യക്തമാക്കിയിരുന്നു. അതിവേഗം അക്രമാസക്തമായി കോവിഡ്-19 വൈറസിനെതിരായ പ്രതിരോധം തീര്ക്കണമെന്ന് ലോകാരോഗ്യ സംഘടനാ തലവന് ഡോ.ടെഡ്രോസ് ഗബ്രിയെസാസ് ലോക രാജ്യങ്ങളോട് ആഹ്വാനം ചെയ്തു.