രാജീവ് ഗാന്ധി വധക്കേസ് പ്രതി പേരറിവാളന് 30 ദിവസത്തെ പരോള് അനുവദിച്ചു മദ്രാസ് ഹൈകോടതി. ജയിലിലെ അന്തേവാസികള്ക്ക് കൊവിഡ് ഉണ്ടെന്നും മകന്റെ ആരോഗ്യം അപകടത്തിലാണെന്നും വിദഗ്ദ ചികിത്സയ്ക്കായി മൂന്ന് മാസത്തെ പരോള് അനുവദിക്കണമെന്നും പേരറിവാളന്റെ അമ്മ അര്പുതമ്മാള് അപേക്ഷ സമര്പ്പിച്ചിരുന്നു. എന്നാല് സംസ്ഥാന സര്ക്കാര് അപേക്ഷ നിരസിക്കുകയായിരുന്നു.
പേരറിവാളന് ഉള്പ്പടെ കേസിലെ പ്രതികളായ ഏഴ് പേരെയും വിട്ടയയ്ക്കാന് 2014ല് ജയലളിത സര്ക്കാര് ശുപാര്ശ നല്കിയിരുന്നു. തുടര്ന്ന് സര്ക്കാര് ശിപാര്ശയില് ഗവര്ണറുടെ തീരുമാനം വൈകുന്നത് ചൂണ്ടിക്കാട്ടി പേരറിവാളന്റെ അമ്മ അര്പുതമ്മാള് കോടതിയില് ഹര്ജി സമര്പ്പിച്ചിരുന്നു.
പ്രതികളെ ജയില് മോചിതരാക്കുന്ന കാര്യത്തില് തീരുമാനമെടുക്കാന്, സിബിഐയുടെ നേതൃത്വത്തിലുള്ള മള്ട്ടി ഡിസിപ്ലിനറി മോണിറ്ററിങ് ഏജന്സിയുടെ അന്തിമ റിപ്പോര്ട്ടിനായി കാത്തിരിക്കുകയാണെന്നാണ് ഗവര്ണറുടെ ഓഫീസ് അറിയിച്ചിട്ടുള്ളത്. അന്തിമ റിപ്പോര്ട്ട് വിലയിരുത്താതെ പ്രതികളെ മോചിപ്പിക്കാമെന്ന സര്ക്കാര് ശുപാര്ശയില് തീരുമാനം എടുക്കാന് കഴിയില്ലെന്നും ഗവര്ണറുടെ ഓഫീസ് വ്യക്തമാക്കിയിരുന്നു.