പുതുതായി രൂപീകരിച്ച പ്രത്യേക സേനയ്ക്ക് വാറണ്ടില്ലാതെ അറസ്റ്റും തെരച്ചിലും നടത്താനുള്ള അധികാരം നല്കി യു.പി സര്ക്കാര്. ഉത്തര്പ്രദേശ് സ്പെഷ്യല് സെക്യൂരിറ്റി ഫോഴ്സ് ആക്റ്റ്, 2020 അനുസരിച്ച്, സേനയ്ക്ക് അറസ്റ്റുചെയ്യാനോ സെര്ച്ച് ചെയ്യാനോ മജിസ്ട്രേറ്റിന്റെ ഉത്തരവോ വാറണ്ടുകളോ ആവശ്യമില്ല.
ആദ്യ ഘട്ടത്തില് 9,900 ഉദ്യോഗസ്ഥരേയാണ് നിയമിക്കുക. അടുത്ത മൂന്ന് മാസത്തിനുള്ളില് സേനക്ക് അന്തിമ രൂപം നല്കും. കേന്ദ്ര വ്യാവസായിക സുരക്ഷാ സേനയുടെ മാതൃകയില്, സുപ്രധാന സര്ക്കാര്, സ്വകാര്യ കെട്ടിടങ്ങളുടെയും വ്യാവസായ സ്ഥാപനങ്ങളുടെയും സുരക്ഷയുടെ ഉത്തരവാദിത്തം ഈ എസ്എസ്എഫിനായിരിക്കും.
യോഗി ആദിത്യനാഥിന്റെ സ്വപ്ന പദ്ധതിയാണ് യു.പി പ്രത്യേക സുരക്ഷാ സേനയെന്ന് അഡീഷണല് ചീഫ് സെക്രട്ടറി അവാനിഷ് കുമാര് അവസ്തി പറഞ്ഞു. വെള്ളിയാഴ്ച ഡിജിപി നിയമത്തിന്റെ പകര്പ്പ് അയച്ചതായും അടുത്ത മൂന്ന് ദിവസത്തിനുള്ളില് ഒരു റോഡ് മാപ്പ് തയ്യാറാക്കാന് പോലീസ് ഡയറക്ടര് ജനറലിന് നിര്ദേശം നല്കിയതായും അവസ്തി വ്യക്തമാക്കി. പ്രത്യേക അധികാരം ദുരുപയോഗം ചെയ്യപ്പെടും എന്നുള്പ്പെടെ നിരവധി വിമര്ശനങ്ങളും സേനയ്ക്കെതിരെ ഉയരുന്നുണ്ട്.