കൊവിഡ് പ്രതിരോധ പ്രവർത്തനങ്ങൾ രണ്ടാഴ്ചക്കകം ശക്തമാക്കാൻ പൊലീസിന് ചീഫ് സെക്രട്ടറിയുടെ നിർദ്ദേശം. ഇത് സംബന്ധിച്ച് ചീഫ് സെക്രട്ടറി ആഭ്യന്തര സെക്രട്ടറിക്കും ഡിജിപിക്കും കത്ത് നൽകി. കൊവിഡ് പ്രതിരോധ പ്രവർത്തനങ്ങൾക്ക് പൊലീസ് തന്നെ നേതൃത്വം നൽകണമെന്ന് കത്തിലുണ്ട്. ക്വാറന്റീൻ നിരീക്ഷണം, സമൂഹ്യ അകലം പാലിക്കൽ, സമ്പർക്ക പട്ടിക തയ്യാറാക്കാൽ എന്നീ പ്രവൃത്തികൾ പൊലീസിനെ ഏൽപ്പിക്കാൻ കഴിഞ്ഞ ദിവസമാണ് സർക്കാർ തീരുമാനിച്ചത്. രണ്ടാഴ്ച കൊണ്ട് മഹാമാരി നിയന്ത്രിക്കാൻ പൊലീസ് നേരിട്ട് ഇടപെടണമെന്നാണ് ചീഫ് സെക്രട്ടറി ആവശ്യപ്പെട്ടിരിക്കുന്നത്.
മുഖ്യമന്ത്രിയുട നിർദ്ദേശപ്രകാരമാണ് ഇത്തരത്തിൽ ആവശ്യം ഉന്നയിക്കുന്നതെന്ന് കത്തിൽ വ്യക്തമാക്കുന്നുണ്ട്. എല്ലാ ജില്ലകളിലും ഇതിനായുള്ള നടപടികൾ എടുക്കണമെന്നും നിർദ്ദേശം നൽകിയിട്ടുണ്ട്. ഈ സമയത്തിനുള്ളിൽ കൊവിഡ് ജാഗ്രത കർശനമാക്കി നടപ്പാക്കണമെന്നും ചീഫ് സെക്രട്ടറി വ്യക്തമാക്കി. കൂടുതൽ നിർദ്ദേശങ്ങൾ വരും ദിവസങ്ങളിൽ നൽകുമെന്നാണ് കരുതുന്നത്. പ്രാഥമികമായ അറിയിപ്പ് മാത്രമാണ് ചീഫ് സെക്രട്ടറി നൽകിയിരിക്കുന്നത്.