ഇടുക്കി നിശാപാർട്ടി കേസിൽ പ്രതിയായ ക്വാറി ഉടമ റോയ് കുര്യനെതിരെ കോതമംഗലത്ത് വാഹനങ്ങളുടെ റോഡ് ഷോ നടത്തിയതിന്റെ പേരിൽ പൊലീസ് കേസെടുത്തു. ഒരു കോടി രൂപ വിലയുള്ള ആഡംബര കാറിന് മുകളിൽ ഇരുന്ന് 8 ടോറസ് ലോറികളെ അകമ്പടിയായി അണിനിരത്തി റോഡ് ഷോ നടത്തുന്നതിനിടെയാണ് പൊലീസ് അറസ്റ്റ് ചെയ്തത്. റോഡ് ഷോയിൽ പങ്കെടുത്ത കാറടക്കം 9 വാഹനങ്ങളാണ് പൊലീസ് കസ്റ്റഡിയിൽ എടുത്തത്. അപകടകരമായ രീതിയിൽ വാഹനം ഓടിച്ചതിന് ലോറി ഡ്രൈവർമാർക്കെതിരെയും, വാഹനത്തിന് മുകളിൽ ഇരുന്ന് യാത്ര ചെയ്തതിന് റോയ് കുര്യനെതിരെയുമാണ് കേസ് എടുത്തിരിക്കുന്നത്. കൊവിഡ് മാനദണ്ഡങ്ങൾ ലംഘിച്ചതിന്റെ പേരിലും കേസ് എടുത്തിട്ടുണ്ട്. കോതമംഗലം പൊലീസാണ് വാഹനങ്ങൾ പിടിച്ചെടുത്തത്. വാഹനങ്ങൾ കോടതിയിൽ ഹാജരാക്കും.
4 ദിവസം മുമ്പാണ് ഈ വാഹനങ്ങൾ റോയ് കുര്യൻ വാങ്ങിയത്. പുതിയ വാഹനങ്ങളുടെ ഫോട്ടോ ഷൂട്ട് ഭൂതത്തെത്താൻ കെട്ടിൽ നടന്നിരുന്നു. ഇവിടെ നിന്ന് തിരുച്ചുവരും വഴിയാണ് കോതമംഗലം ടൗണിൽ റോഡ് ഷോ നടത്തിയത്.
കഴിഞ്ഞ മാസം 28 നാണ് രാജാപ്പാറയിലെ റോയ് കുര്യന്റെ മെറ്റൽ ക്രഷർ യൂണിറ്റ് ഉദ്ഘാടനത്തോട് അനുബന്ധിച്ച് നിശാപാർട്ടിയും ബെല്ലി ഡാൻസും സംഘടിപ്പിച്ചത്. കൊവിഡ് മാനദണ്ഡങ്ങൾ ലംഘിച്ച് പുലർച്ചെ 2 മണിവരെയായിരുന്നു പാർട്ടി നീണ്ടു നിന്നത്. ഇതിന്റെ പേരിൽ റോയ് കുര്യൻ ഉൾപ്പെടെ 47 പേർക്കെതിരെ പൊലീസ് കേസെടുത്തിരുന്നു. ഈ കേസിൽ ജാമ്യത്തിൽ ഇറങ്ങിയാണ് കൊവിഡ് മാനദണ്ഡങ്ങൾ ലംഘിച്ച് വാഹന റാലി നടത്തിയത്.
