ഡല്‍ഹി: രാജ്യത്ത് കഴിഞ്ഞ 24 മണിക്കൂറിനുള്ളില്‍ 9,633 പേര്‍ക്കാണ് കൊവിഡ് -19 സ്ഥിരീകരിച്ചത്. ഇന്നലെയിത് 8,485 ഉം ചൊവാഴ്ച 8,097 പേര്‍ക്കുമാണ് കൊവിഡ് -19 സ്ഥിരീകരിച്ചത്. കഴിഞ്ഞ നാലുദിവസങ്ങളായി 8000 ത്തിനു മുകളില്‍ തുടര്‍ന്നിരുന്ന പ്രതിദിന രോഗീ വര്‍ദ്ധന ഇന്ന് ഒറ്റയടിക്ക് 9,633 ലെക്കെത്തിയിരിക്കുകയാണ്. ക്രമാനുഗതമായ വര്‍ദ്ധനവാണ് പുതിയ രോഗികളുടെ നിരക്കില്‍ കാണാനാവുന്നത്. ഏറ്റവും പുതിയ കണക്കനുസരിച്ച് ഇന്ത്യയിലെ രോഗികളുടെ എണ്ണം 2,16,824 ആയി.
പ്രതിദിന രോഗീ വര്‍ദ്ധനവ് കൂടുന്നതിനനുസരിച്ച് കൊവിഡ് വ്യാപനം ശക്തമായ രാജ്യങ്ങളുടെ പട്ടികയില്‍ ഇന്ത്യ മുകളിലേക്ക് എത്തുകയാണ്. കൊവിഡ് താണ്ഡവമാടിയ ഫ്രാന്‍സിനെ (1,89,220 രോഗികള്‍) പുറകിലാക്കിയാണ് ഇന്ത്യ ഇപ്പോള്‍ ഏഴാമതെത്തിയിരിക്കുന്നത്. യൂറോപ്പില്‍ ബ്രിട്ടന്‍ കഴിഞ്ഞാല്‍ ഏറ്റവും കൂടുതല്‍ രോഗികള്‍ (2,33,836) ഉള്ള ഇറ്റലിയാണ് പട്ടികയില്‍ ഇന്ത്യക്ക് തൊട്ടുമുകളിലുള്ളത്. രോഗീ വര്‍ദ്ധനവില്‍ ഇറ്റലിയില്‍ പ്രതിദിനം വെറും 500 താഴെ പുതിയ രോഗികള്‍ മാത്രമാണ് റിപ്പോര്‍ട്ട് ചെയ്യപ്പെടുന്നത്. ഇപ്പോഴത്തെ ട്രെന്‍ഡ് തുടര്‍ന്നാല്‍ അതിവേഗം ഇന്ത്യ പട്ടികയില്‍ മുകളിലെത്താനുള്ള സാദ്ധ്യത തള്ളിക്കളയാനാവില്ല.
കഴിഞ്ഞ 48 മണിക്കൂറിനുള്ളില്‍ 259 പേരാണ് രാജ്യത്ത് കൊവിഡ് -19 ബാധിച്ച് മരണപ്പെട്ടത്. ഏറ്റവും പുതിയ കണക്കനുസരിച്ച് രാജ്യത്താകെ മരണപ്പെട്ടവരുടെ എണ്ണം 6,088 ആയി. 1,04,047 പേര്‍ ഇതിനകം രോഗ വിമുക്തി നേടി.
