തിരുവനന്തപുരം: സംസ്ഥാനത്ത് ജൂണ് 1 (ഇന്ന്) നു തന്നെ കാലവര്ഷമെത്തിയതായി കേന്ദ്ര കാലാവസ്ഥാ വകുപ്പ് അറിയിച്ചു. വ്യാഴാഴ്ച വരെയുള്ള അടുത്ത മൂന്നു ദിവസം സംസ്ഥാനത്ത് കനത്ത മഴയുണ്ടാകുമെന്നാണ് കാലാവസ്ഥാ കേന്ദ്രത്തിന്റെ അറിയിപ്പ്. പതിവു രീതിയിലുള്ള മഴയാണ് ലഭിക്കുകയെങ്കിലും തീര പ്രദേശങ്ങളിലും, മലയോര മേഖലകളിലും ഒറ്റപ്പെട്ട കനത്ത മഴയ്ക്ക് സാദ്ധ്യതയുള്ളതായാണ് പ്രവചനം.
തീര പ്രദേശങ്ങളില് കനത്ത മഴ പ്രവചിക്കുന്ന കാലാവസ്ഥാ കേന്ദ്രം കടല് പ്രക്ഷുബ്ദമാകാന് സാധ്യതയുണ്ടെന്നും മത്സ്യ തൊഴിലാളികള് അടുത്ത രണ്ടു ദിവസത്തേക്ക് (48 മണിക്കൂര്) കടലില് പോകരുതെന്നും മുന്നറിയിപ്പ് നല്കിയിട്ടുണ്ട്. സംസ്ഥാനത്തെ 9 ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം. പത്തനംതിട്ട, കോട്ടയം, ആലപ്പുഴ, ഇടുക്കി, എറണാകുളം, മലപ്പുറം, കണ്ണൂര് എന്നീ ഒന്പതു ജില്ലകളിലാണ് യെല്ലോ അലര്ട്ട് പ്രഖ്യാപിച്ചിരിക്കുന്നത്.
അറബിക്കടലില് രൂപം കൊണ്ട ന്യൂനമര്ദ്ദം ശക്തി പ്രാപിക്കാനിടയുണ്ടെന്നും ബുധനാഴ്ചയോടെ ഇത് ചുഴലിക്കാറ്റായി രൂപപ്പെട്ട് മഹാരാഷ്ട്രാ, ഗുജറാത്ത് തീരങ്ങളിലേക്ക് നീങ്ങുമെന്നുമാണ് മുന്നറിയിപ്പ്.