തൃശൂര്: ബന്ധം മുതലെടുത്ത് പലരും സുരേഷ് ഗോപിക്കുവേണ്ടി അച്ഛനെ സ്വാധീനിക്കാന് ശ്രമിക്കുന്നുണ്ടെന്ന ആരോപണവുമായി കലാമണ്ഡലം ഗോപി ആശാന്റെ മകന് രഘുരാജ്. സുരേഷ് ഗോപിക്കുവേണ്ടി പല വി ഐ പികളും കലാമണ്ഡലം ഗോപിയെ സ്വാധീനിക്കാന് ശ്രമിക്കുന്നുണ്ടെന്നും ആ ഗോപിയല്ല ഈ ഗോപിയെന്ന് മനസിലാക്കണമെന്നും രഘുരാജ് പറഞ്ഞു. ഫേസ്ബുക്കിലൂടെയാണ് അദ്ദേഹം ഇക്കാര്യം വെളിപ്പെടുത്തിയത്. 'സുരേഷ് ഗോപി നാളെ വരുമെന്നും അനുഗ്രഹിക്കണമെന്നും പറഞ്ഞ് ഒരു ഡോക്ടര് വിളിച്ചു. അച്ഛന് അവരുടെ ആവശ്യം നിരസിച്ചപ്പോള് പത്മഭൂഷന് വാഗ്ദാനം ചെയ്തു. എന്നാല് അങ്ങനെയുളള പത്മഭൂഷന് വേണ്ടെന്നാണ് അച്ഛന് പറഞ്ഞത്- രഘുരാജ് പറഞ്ഞു.
'സുരേഷ് ഗോപിക്കുവേണ്ടി പല വി ഐപികളും അച്ഛനെ സ്വാധീനിക്കാന് നോക്കുന്നു. ആ ഗോപിയല്ല ഈ ഗോപിയെന്ന് മാത്രം മനസിലാക്കുക. വെറുതെ ഉളള സ്നേഹവും ബഹുമാനവും കളയരുത്. പലരും സ്നേഹം നടിച്ച് സഹായിക്കുന്നത് ഇതിനാണ് എന്ന് ഇന്നാണ് മനസിലായത്. എല്ലാവര്ക്കും രാഷ്ട്രീയമുണ്ട്. അത് താല്ക്കാലിക ലാഭത്തിനല്ല. നെഞ്ചില് ആഴ്ന്നിറങ്ങിയതാണ്. നിങ്ങളോടുളള ബഹുമാനം മുതലാക്കാന് നോക്കരുത്. പ്രശസ്തനായ ഒരു ഡോക്ടര് വിളിച്ച് പറയുന്നു നാളെ അങ്ങോട്ട് വരുന്നുണ്ട് സുരേഷ് ഗോപിയെ അനുഗ്രഹിക്കണം എന്ന്. അച്ഛന് മറുത്തൊന്നും പറയാനാകാത്ത ഡോക്ടര്. അച്ഛന് എന്നോട് പറയാന് പറഞ്ഞു. ഞാന് സാറെ വിളിച്ച് പറഞ്ഞു. ഞാന് പറഞ്ഞു. എന്നോട് പറയാന് നിങ്ങളാരാ അസുഖം വന്നപ്പോള് ഞാനേ ഉണ്ടായിരുന്നുളളു എന്ന്. അത് മുതലെടുക്കാന് വരരുത് എന്ന് ഞാന് പറഞ്ഞു. അച്ഛന് വിളിച്ച് വരേണ്ട എന്ന് പറഞ്ഞു. അപ്പോള് ഡോക്ടര് ആശാന് പത്മഭൂഷന് കിട്ടണ്ടേ എന്ന്. ഇനിയും ആരും ബിജെപിക്കും കോണ്ഗ്രസിനും വേണ്ടി ഈ വീട്ടില് കയറി സഹായിക്കേണ്ട. ഇതൊരു അപേക്ഷയായി കണ്ടാല് മതി'- എന്നാണ് രഘുരാജ് ഫേസ്ബുക്കില് കുറിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കുറിപ്പ് വലിയ ചര്ച്ചയായതോടെ അദ്ദേഹം പോസ്റ്റ് പിന്വലിക്കുകയും ചെയ്തു. സ്നേഹം കൊണ്ട് ചൂഷണം ചെയ്യരുത് എന്ന് പറയാന് വേണ്ടി മാത്രമാണ് പോസ്റ്റിട്ടതെന്നും ആ ചര്ച്ച അവസാനിപ്പിക്കണമെന്നും അദ്ദേഹം പറഞ്ഞു.