ഡല്‍ഹി: ഇസ്രായേലിലെ നിര്‍മ്മാണ മേഖലയിലേക്ക് ഇന്ത്യയില്‍നിന്നും തൊഴിലാളികളെ റിക്രൂട്ട് ചെയ്യാനുളള നീക്കത്തിനെതിരെ പ്രധാനമന്ത്രി നരേന്ദ്രമോദിക്ക് കത്തയച്ച് സിപിഎം നേതാവും എംപിയുമായ ബിനോയ് വിശ്വം. ഇസ്രായേലും ഹമാസും തമ്മില്‍ യുദ്ധം തുടരുന്ന പശ്ചാത്തലത്തില്‍ ഇസ്രായേലില്‍ ജോലി ചെയ്തിരുന്ന 90,000-ഓളം ഫലസ്തീനികളുടെ വര്‍ക്ക് പെര്‍മിറ്റ് റദ്ദാക്കിയതോടെ ഉണ്ടായ ഒഴിവിലേക്ക് ഇന്ത്യന്‍ തൊഴിലാളികളെ റിക്രൂട്ട് ചെയ്യാന്‍ ശ്രമിക്കുന്നതായി റിപ്പോര്‍ട്ടുണ്ടായിരുന്നു. ബിജെപിയുടെ ഭരണത്തിനുകീഴിലുളള ദാരിദ്രവും തൊഴിലില്ലായ്മയുമാണ് തുച്ഛമായ വരുമാനം ലഭിക്കുന്ന ജോലിക്കായി വിദേശത്തുപോകാന്‍ തൊഴിലാളികളെ നിര്‍ബന്ധിതരാക്കുന്നതെന്നും യുദ്ധം മൂലം നശിച്ച ഒരു രാജ്യത്തേക്ക് പാവപ്പെട്ട തൊഴിലാളികളെ അയയ്ക്കുന്നത് ലജ്ജാകരമാണെന്നും ബിനോയ് വിശ്വം എംപി പറഞ്ഞു.
'നിലവില്‍ ലഭ്യമായ കണക്കനുസരിച്ച് ഗാസയില്‍ ഒരു മാസത്തില്‍ പതിനായിരത്തിലധികം ജനങ്ങളാണ് കൊല്ലപ്പെട്ടത്. ഏകദേശം 1400 ഓളം ഇസ്രായേലികളും കൊല്ലപ്പെട്ടു. ഇത്തരമൊരു സംഘര്‍ഷബാധിത മേഖലയിലേക്ക് തൊഴിലാളികളെ അയയ്ക്കുമ്പോള്‍ അവരുടെ സുരക്ഷ സര്‍ക്കാരിനു മുന്നില്‍ ഒരു ചോദ്യചിഹ്നമാണ്. നിങ്ങളുടെ സര്‍ക്കാരിനു കീഴിലുണ്ടായ ദാരിദ്രവും തൊഴിലില്ലായ്മയുമാണ് തുച്ഛമായ വരുമാനം ലഭിക്കുന്ന ജോലിക്കായി വിദേശത്ത് പോകാന്‍ അവരെ നിര്‍ബന്ധിതരാക്കുന്നത്. യുദ്ധം മൂലം നശിച്ച ഒരു രാജ്യത്തേക്ക് പാവപ്പെട്ട തൊഴിലാളികളെ അയയ്ക്കുന്നത് ലജ്ജാകരമാണ്'- ബിനോയ് വിശ്വം എംപി കത്തില്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇന്ത്യ കാലങ്ങളായി പിന്തുടരുന്ന ഫലസ്തീന്‍ അനുകൂല നിലപാടില്‍ നിന്നുളള വ്യതിചലനമാണ് കേന്ദ്രസര്‍ക്കാരിന്റെ ഇസ്രായേല്‍ അനുകൂല നടപടിയെന്നും ബിനോയ് വിശ്വം പറഞ്ഞു. ഇന്ത്യന്‍ പൗരന്മാരെ യുദ്ധഭൂമിയിലേക്ക് അയച്ച് അവരുടെ ജീവിതം അപകടത്തിലാക്കരുതെന്നും ഫലസ്തീനുളള ഇന്ത്യയുടെ പിന്തുണ നിലനിര്‍ത്തണമെന്നും അദ്ദേഹം കൂട്ടിച്ചേര്‍ത്തു.
