തിരുവനന്തപുരം: പാഠപുസ്തകങ്ങളില് ഇന്ത്യയ്ക്ക് പകരം ഭാരത് എന്നാക്കാനുളള എന്സിഇആര്ടിയുടെ തീരുമാനത്തെ വിമര്ശിച്ച് മുഖ്യമന്ത്രി പിണറായി വിജയന്. ഇന്ത്യയ്ക്കുപകരം ഭാരതം എന്നുമതിയെന്ന എന്സിഇആര്ടി സമിതിയുടെ ശുപാര്ശ അംഗീകരിക്കാനാവില്ലെന്നും അതിനുപിന്നിലെ രാഷ്ട്രീയം പകല്പോലെ വ്യക്തമാണെന്നും മുഖ്യമന്ത്രി പറഞ്ഞു. ഇന്ത്യയെന്ന സംജ്ഞ പ്രതിനിധാനം ചെയ്യുന്ന ഉള്ച്ചേര്ക്കലിന്റെ രാഷ്ട്രീയത്തെ സംഘപരിവാര് ഭയപ്പെടുന്നുവെന്നും അതിന്റെ ഭാഗമായാണ് ഇന്ത്യയെന്ന പദത്തോടുളള വെറുപ്പെന്നും അദ്ദേഹം പറഞ്ഞു. ഫേസ്ബുക്കിലൂടെയായിരുന്നു മുഖ്യമന്ത്രിയുടെ പ്രതികരണം.
'സ്കൂള് പാഠപുസ്തകങ്ങളില് നിന്ന് മുഗള് ചരിത്രത്തെക്കുറിച്ചുളള ഭാഗവും ഗാന്ധി വധത്തെത്തുടര്ന്നുണ്ടായ ആര്എസ്എസ് നിരോധനത്തെക്കുറിച്ചുളള ഭാഗവും ഉള്പ്പെടെ ഏകപക്ഷീയമായി ഒഴിവാക്കിയതിന്റെ തുടര്ച്ചയായാണ് പുതിയ നിര്ദേശങ്ങളെ കാണേണ്ടത്. ചരിത്രത്തെ വക്രീകരിക്കുന്ന സംഘപരിവാര് ശ്രമങ്ങള്ക്കനുകൂലമായ നിലപാടുകളാണ് എന്സിഇആര്ടിയില് നിന്നും തുടര്ച്ചയായി ഉണ്ടാവുന്നത്. സംഘപരിവാര് നിര്മ്മിത വ്യാജ ചരിത്രത്തെ വെളളപൂശുന്നതില് പാഠപുസ്തകസമിതി വ്യഗ്രത കാട്ടുകയാണ്'- മുഖ്യമന്ത്രി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ബഹുസ്വരതയിലും സഹവര്ത്തിത്വത്തിലും അധിഷ്ടിതമായ 'ഇന്ത്യ'യെന്ന ആശയത്തിനെതിരാണ് എക്കാലവും സംഘപരിവാറെന്നും അതിന്റെ ഏറ്റവും ഒടുവിലത്തെ ഉദാഹരണമാണ് എന്സിഇആര്ടിയുടെ പുതിയ നിര്ദേശമെന്നും മുഖ്യമന്ത്രി പറഞ്ഞു. എന്സിഇആര്ടി സമര്പ്പിച്ച പൊസിഷന് പേപ്പറിലെ ഭരണഘടനാവിരുദ്ധമായ നിര്ദേശങ്ങള്ക്കെതിരെ ജനാധിപത്യ സമൂഹം രംഗത്തുവരണമെന്നും അദ്ദേഹം കൂട്ടിച്ചേര്ത്തു.