ഇങ്ങനെ പോയാല് ഇന്ത്യ സഖ്യം അടുത്ത മീറ്റിംഗുകള് പൂര്ത്തിയാക്കും മുന്പ് കേന്ദ്ര സര്ക്കാര് എൽപിജി സിലിണ്ടറുകൾ സൗജന്യമായി നൽകുമെന്ന് പരിഹസിച്ച് ശിവസേന (യുബിടി) നേതാവ് ഉദ്ധവ് താക്കറെ. ഇന്ത്യ സഖ്യം കൂടുതല് ശക്തമാകുന്നത് ബിജെപിയെ ഭയപ്പെടുത്തുന്നുവെന്നും അതുകൊണ്ടാണ് ഇപ്പോള്തന്നെ എൽപിജി സിലിണ്ടര് വില കുറച്ചതെന്നും ഇന്നലെ തൃണമൂല് കോണ്ഗ്രസ് നേതാവ് മമത ബാനര്ജി പറഞ്ഞിരുന്നു. അതിനു ചുവടുപിടിച്ചാണ് ശിവസേനയുടെയും പ്രതികരണം.
ഞങ്ങൾക്ക് (പ്രതിപക്ഷ സഖ്യമായ ഇന്ത്യ) പ്രധാനമന്ത്രി സ്ഥാനത്തേക്ക് നിരവധി പേരുകള് നിര്ദേശിക്കാനുണ്ട്. എന്നാല്, ബിജെപിക്ക് എത്ര ഓപ്ഷനുകൾ ഉണ്ട്? എന്നും ഉദ്ധവ് താക്കറെ ചോദിച്ചു. മഹാരാഷ്ട്രയിലെ കോൺഗ്രസ്-സേന-എൻസിപി സഖ്യം മുംബൈയിൽ നടത്തിയ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
അതേസമയം, 'ഇന്ത്യ' യുടെ സുപ്രധാന യോഗത്തിന് ഇന്ന് മുംബൈയില് തുടക്കമാകും. സീറ്റ് വിഭജനം, സഖ്യത്തിന്റെ ലോഗോ, പ്രധാനമന്ത്രി സ്ഥാനാര്ത്ഥി, കൊടി, കോ ഓര്ഡിനേറ്റര് തെരഞ്ഞെടുപ്പ് തുടങ്ങി 2024 ല് നടക്കാനിരിക്കുന്ന ലോക്സഭാ തെരഞ്ഞെടുപ്പിനെ നേരിടാനുളള പല സുപ്രധാന തീരുമാനങ്ങളും യോഗത്തില് കൈക്കൊള്ളുമെന്നാണ് സൂചന. പ്രതിപക്ഷ സഖ്യമായ ഇന്ത്യയുടെ മൂന്നാമത്തെ യോഗമാണ് ഇന്നും നാളെയുമായി മുംബൈയിലെ ഹോട്ടല് ഗ്രാന്ഡ് ഹയാത്തില് നടക്കാനിരിക്കുന്നത്. ആദ്യ രണ്ട് യോഗങ്ങള് പട്നയിലും ബെംഗളൂരുവിലുമായി നടന്നിരുന്നു.