മുംബൈ: മഹാരാഷ്ട്രയിലെ ബിജെപിയുടെ തീപ്പൊരി നേതാവും ദേശീയ സെക്രട്ടറിയുമായ പങ്കജ മുണ്ടെ പാര്‍ട്ടി വിടുമെന്ന് റിപ്പോര്‍ട്ട്. പങ്കജ ബിജെപി വിട്ട് കോണ്‍ഗ്രസില്‍ ചേരുമെന്നാണ് സൂചന. അവര്‍ കോണ്‍ഗ്രസ് മുന്‍ അധ്യക്ഷ സോണിയാ ഗാന്ധിയുമായും രാഹുല്‍ ഗാന്ധിയുമായും ചര്‍ച്ച നടത്തിയായി ലോക്മത് ന്യൂസുള്‍പ്പെടെയുളള ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. പങ്കജയെ കോണ്‍ഗ്രസിലേക്ക് സ്വാഗതം ചെയ്യുന്നുവെന്ന് മഹാരാഷ്ട്ര കോണ്‍ഗ്രസ് അധ്യക്ഷന്‍ നാനാ പടോലെ പറഞ്ഞു. മഹാരാഷ്ട്ര മുന്‍ ഉപമുഖ്യമന്ത്രിയായിരുന്ന ഗോപിനാഥ് മുണ്ടെയുടെ മകളാണ് പങ്കജ മുണ്ടെ. ദേവേന്ദ് ഫട്‌നാവിസ് മന്ത്രിസഭയില്‍ വനിതാ-ശിശു വികസന വകുപ്പ് മന്ത്രിയായിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഫട്‌നാവിസുമായുളള സ്വരച്ചേര്‍ച്ചയില്ലായ്മ മൂലം പാര്‍ട്ടിയില്‍ ഒതുക്കപ്പെട്ട നിലയിലാണ് പങ്കജ മുണ്ടെ. ബിജെപി-ശിവസേന സഖ്യത്തില്‍ മന്ത്രിയായെങ്കിലും പിന്നീട് കാര്യമായ സ്ഥാനങ്ങളൊന്നും ലഭിച്ചില്ല. ശിവസേനയും എന്‍സിപിയും പിളരുകയും അടുത്ത ബന്ധുവും ബദ്ധശത്രുവുമായ ധനഞ്ജയ് മുണ്ടെ ബിജെപിയില്‍ ചേരുകയും ചെയ്തതോടെ അവരുടെ നില പരിതാപകരമായി. കഴിഞ്ഞ തെരഞ്ഞെടുപ്പില്‍ ഗോപിനാഥ് മുണ്ടെയുടെ ജ്യേഷ്ഠന്റെ മകന്‍ കൂടിയായ ധനഞ്ജയ് മുണ്ടെയോടാണ് പര്‍ളി മണ്ഡലത്തില്‍ പങ്കജ പരാജയപ്പെട്ടത്.
അടുത്ത തവണ ബിജെപി പിന്തുണയോടെ എന്‍സിപി സ്ഥാനാര്‍ത്ഥിയായി ധനഞ്ജയ് വരാനാണ് സാധ്യത. ഇത് തന്റെ രാഷ്ട്രീയഭാവി ഇല്ലാതാക്കുമോ എന്ന് പങ്കജയ്ക്ക് ഭയമുണ്ട്. മഹാരാഷ്ട്രയില്‍ അടുത്ത വര്‍ഷം നിയമസഭാ തെരഞ്ഞെടുപ്പ് നടക്കാനിരിക്കെയാണ് പങ്കജ പാര്‍ട്ടിയോട് ഇടയുന്നത്. സംസ്ഥാനത്തെ പ്രബല പിന്നാക്ക വിഭാഗമായ വഞ്ചാരി സമുദായത്തില്‍പ്പെട്ട നേതാവാണ് അവര്‍.
