ബംഗളുരു: തന്റെ നാല്പ്പതുവര്ഷത്തെ രാഷ്ട്രീയ ജീവിതത്തിനിടയില് നരേന്ദ്രമോദിയെപ്പോലെ കളളം പറയുന്നൊരു പ്രധാനമന്ത്രിയെ കണ്ടിട്ടില്ലെന്ന് കര്ണാടക മുഖ്യമന്ത്രി സിദ്ധരാമയ്യ. അധികാരത്തിലെത്തുന്നതിനു മുന്പ് മോദി രാജ്യത്തിന് അച്ഛേ ദിന് വാഗ്ദാനം ചെയ്തിരുന്നെന്നും ജനജീവിതം ദുസ്സഹമായതല്ലാതെ മറ്റൊന്നും സംഭവിച്ചില്ലെന്നും അദ്ദേഹം കുറ്റപ്പെടുത്തി. രാജ്യത്തെ ജനങ്ങള്ക്കിടയില് ഭിന്നത സൃഷ്ടിക്കാനാണ് ബിജെപിയും സംഘപരിവാര് സംഘടനകളും ശ്രമിക്കുന്നതെന്നും ബിജെപി കാരണം ഇന്ത്യയിലെ ഭരണഘടനയും ജനാധിപത്യവും ഭീഷണിയിലാണെന്നും സിദ്ധരാമയ്യ പറഞ്ഞു. മഹാരാഷ്ട്രയിലെ സംഗ്ലിയില് നടന്ന പൊതുപരിപാടിയിലായിരുന്നു അദ്ദേഹത്തിന്റെ പരാമര്ശം.
'എന്റെ 40 വര്ഷത്തെ രാഷ്ട്രീയ ജീവിതത്തില് മോദിയെപ്പോലെ കളളം പറയുന്ന പ്രധാനമന്ത്രിയെ ഞാന് കണ്ടിട്ടില്ല. മോദി അച്ഛേ ദിന് വാഗ്ദാനം ചെയ്തു. എന്നിട്ട് അച്ഛേ ദിന് എവിടെ? പെട്രോള്, ഡീസല്, പാചകവാതകം തുടങ്ങി അവശ്യവസ്തുക്കളുടെ വില വര്ധിച്ചതും ജനജീവിതം ദുസ്സഹമായതുമല്ലാതെ എന്താണുണ്ടായത് ? മോദിയുടെ ജനപ്രീതി കുറഞ്ഞുവരികയാണ് എന്നതിന് തെളിവാണ് കര്ണാടക തെരഞ്ഞെടുപ്പ് ഫലം'- സിദ്ധരാമയ്യ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കര്ണാടക തെരഞ്ഞെടുപ്പ് സമയത്ത് താനും ഡികെ ശിവകുമാറും സംസ്ഥാനത്തിന്റെ എല്ലാ കോണുകളിലൂടെയും സഞ്ചരിച്ച് മോദി സര്ക്കാര് നടത്തുന്ന അനീതികളെക്കുറിച്ചും അഴിമതികളെക്കുറിച്ചും ജനങ്ങളെ ബോധവാന്മാരാക്കിയെന്നും വരും തെരഞ്ഞെടുപ്പുകളിലും ഇതേ രീതി തുടരേണ്ടതുണ്ടെന്നും സിദ്ധരാമയ്യ പറഞ്ഞു. മഹാരാഷ്ട്രയിലെ ഷിന്ഡെ- ഫട്നാവിസ് സര്ക്കാര് അഴിമതി സര്ക്കാരാണെന്നും അടുത്ത തെരഞ്ഞെടുപ്പില് അവരെ തുരത്തണമെന്നും അദ്ദേഹം കൂട്ടിച്ചേര്ത്തു.