എറണാകുളം: മഹാരാജാസ് കോളേജിന്റെ പേരില് വ്യാജ രേഖ നിര്മ്മിച്ച സംഭവത്തില് ആരോപണവിധേയയായ മുന് എസ് എഫ് ഐ നേതാവ് കെ വിദ്യക്കെതിരെ വിമര്ശനവുമായി എഴുത്തുകാരന് ബെന്യാമിന്. വിദ്യ മഹാരാജാസ് കോളേജിനും സാഹിത്യലോകത്തിനും വിദ്യാര്ത്ഥി സമൂഹത്തിനും അപമാനമാണെന്ന് ബെന്യാമിന് പറഞ്ഞു. ഇനിയും വിദ്യമാര് ഉണ്ടാവാതിരിക്കാന് കുറ്റക്കാരിയെങ്കില് വിദ്യക്കെതിരെ അന്വേഷണവും കര്ശന നടപടിയുമുണ്ടാകണമെന്നും ബെന്യാമിന് പറഞ്ഞു. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
'കെ വിദ്യ മഹാരാജാസിന് അപമാനമാണ്. സാഹിത്യ ലോകത്തിന് അപമാനമാണ്. വിദ്യാര്ത്ഥി സമൂഹത്തിന് അപമാനമാണ്. കളളങ്ങള് കൊണ്ട് വിജയം നേടാം എന്ന് വിചാരിക്കുന്ന ഈ കുട്ടി എന്ത് വിദ്യാഭ്യാസമാണ് നേടിയത്? എന്താണ് കുട്ടികളെ പഠിപ്പിക്കുന്നത്? എന്ത് സാഹിത്യമാണ് എഴുതുന്നത്? വിദ്യമാര് ഇനിയും ആവര്ത്തിക്കാതിരിക്കാന് കര്ശനമായ അന്വേഷണവും കുറ്റക്കാരിയെങ്കില് കടുത്ത ശിക്ഷയും ഉണ്ടാകണം'- ബെന്യാമിന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, വിദ്യക്കെതിരായ അന്വേഷണം പൊലീസ് ഊര്ജ്ജിതമാക്കിയിട്ടുണ്ട്. വിദ്യ ഒളിവിലാണ് എന്നാണ് മാധ്യമങ്ങള് റിപ്പോര്ട്ട് ചെയ്യുന്നത്. വ്യാജ രേഖയുണ്ടാക്കി അധ്യാപക നിയമനത്തിന് ശ്രമിച്ച വിദ്യക്കെതിരെ പൊലീസ് ജാമ്യമില്ലാക്കുറ്റം ചുമത്തിയാണ് കേസെടുത്തത്.