മലപ്പുറം: വന്ദേഭാരത് എക്‌സ്പ്രസിന് തിരൂരില്‍ സ്റ്റോപ്പ് അനുവദിക്കാത്തതിനെതിരെ മുസ്ലീം ലീഗ് രംഗത്ത്. ട്രെയിനിന് തിരൂരില്‍ സ്റ്റോപ്പ് ഒഴിവാക്കിയത് ജില്ലയിലെ ജനങ്ങളോടുളള വിവേചനമാണെന്ന് ലീഗ് ജനറല്‍ സെക്രട്ടറി പിഎംഎ സലാം പറഞ്ഞു. രാഷ്ട്രീയ താല്‍പ്പര്യംവെച്ച് ഇത്തരം തീരുമാനങ്ങളെടുക്കുമ്പോള്‍ ഉദ്ദേശശുദ്ധി വഴിമാറുമെന്നും തിരൂരില്‍ സ്റ്റോപ്പ് ആവശ്യപ്പെട്ട് ലീഗ് സമരരംഗത്തേക്ക് കടക്കുമെന്നും അദ്ദേഹം പറഞ്ഞു. തിരുവനന്തപുരം മുതല്‍ കാസര്‍ഗോഡ് വരെ പോകുന്ന വന്ദേഭാരത് ട്രെയിനിന് കടന്നുപോകുന്ന ജില്ലകളിലെല്ലാം സ്‌റ്റോപ്പുണ്ട്. എന്നാല്‍ മലപ്പുറത്ത് സ്റ്റോപ്പില്ല. ഇതിനെതിരെ വ്യാപക വിമര്‍ശനമാണ് ഉയര്‍ന്നുവരുന്നത്.
തിരൂരിനെ ഒഴിവാക്കിയുളള വന്ദേഭാരത് സ്റ്റോപ്പുകളുടെ ലിസ്റ്റ് അംഗീകരിക്കാനാവില്ലെന്നും രണ്ടാമത്തെ പരീക്ഷണ ഓട്ടത്തില്‍ തിരൂര് നിര്‍ത്താതെ പോയപ്പോള്‍തന്നെ അവഗണനയുടെ സൂചന ലഭിച്ചിരുന്നെന്നും ഇടി മുഹമ്മദ് ബഷീര്‍ എംപി പറഞ്ഞു. കേരളത്തില്‍ ഏറ്റവും കൂടുതല്‍ ജനസംഖ്യയുളള മലപ്പുറത്തെ പ്രധാന സ്റ്റേഷനായ തിരൂരിനോടുളള അവഗണനക്കെതിരെ ജനങ്ങളെ അണിനിരത്തി ശക്തമായ സമരപരിപാടി നടത്തുമെന്നും അദ്ദേഹം വ്യക്തമാക്കി.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മലപ്പുറം ജില്ലയോട് കടുത്ത അവഗണനയാണ് ഭരണകൂടം കാണിക്കുന്നതെന്ന് ടി വി ഇബ്രാഹിം എംഎല്‍എ പറഞ്ഞു. തിരൂര് സ്റ്റോപ്പില്ലാത്തതിനെ ഒരു തരത്തിലും നീതീകരിക്കാനാവില്ലെന്നും രാജ്യം അതിനകത്തുളള ഒരു പ്രദേശത്തെ ജനതയോട് വിഭവ വിതരണത്തില്‍ കാണിച്ചുകൊണ്ടിരിക്കുന്ന ബോധപൂര്‍വ്വമായ നീതികേടിനെ തിരിച്ചറിഞ്ഞ് അവകാശങ്ങള്‍ക്കായി പോരാടുക തന്നെ വേണമെന്നും അദ്ദേഹം കൂട്ടിച്ചേര്‍ത്തു.
