കാസര്ഗോഡ്: പൗരത്വ ഭേദഗതി ബില്ലിന്റെ കാര്യത്തിലും കശ്മീര് വിഷയത്തിലും സുപ്രീംകോടതി ജഡ്ജിമാര് പരാജയപ്പെട്ടെന്ന് സിപിഎം പൊളിറ്റ് ബ്യൂറോ അംഗം എം എ ബേബി. പൗരത്വ ഭേദഗതി നിയമം ഭരണഘടനാപരമാണോ അല്ലയോ എന്ന് തീരുമാനിക്കാതെ ജഡ്ജിമാര് സിഎഎയ്ക്കെതിരെ വന്ന ഹര്ജികളില് കിടന്നുറങ്ങുകയായിരുന്നെന്ന് എം എ ബേബി പറഞ്ഞു. ജമ്മു കശ്മീരിന്റെ പ്രത്യേക പദവിയെടുത്ത് കളഞ്ഞതുമായി ബന്ധപ്പെട്ട കേസ് സുപ്രീംകോടതിയിലെത്തിയപ്പോള് അതിലുളള ആപത്കരമായ ഭാഗം തൊടാന് പോലും ജഡ്ജിമാര് തയാറായില്ലെന്നും അദ്ദേഹം പറഞ്ഞു. കേന്ദ്രസര്ക്കാര് ജീവനക്കാരുടെ കോണ്ഫെഡറേഷന്റെയും എന് എഫ് പി ഇയുടെയും അഖിലേന്ത്യാ ജനറല് സെക്രട്ടറിയായിരുന്ന എം കൃഷ്ണന്റെ രണ്ടാം ചരമവാര്ഷികത്തോടനുബന്ധിച്ച് കാഞ്ഞങ്ങാട് നടത്തിയ അനുസ്മരണ യോഗത്തില് പങ്കെടുത്ത് സംസാരിക്കവേയായിരുന്നു എം എ ബേബിയുടെ പരാമര്ശം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
'ഇന്ത്യന് ഭരണഘടനയുടെ അടിസ്ഥാന തത്വങ്ങള് സംരക്ഷിക്കാന് ബാധ്യതയുളള സുപ്രീംകോടതി ജഡ്ജിമാര് സിഎഎ- കശ്മീര് വിഷയങ്ങളില് പരാജയപ്പെട്ടു. പൗരത്വത്തിന്റെ മാനദണ്ഡം മതമല്ലെന്ന് ഇന്ത്യന് ഭരണഘടനയില് പറയുന്നുണ്ട്. മോദി സര്ക്കാര് സിഎഎ കൊണ്ടുവന്ന് അത് അട്ടിമറിച്ചു. ഇത് ശരിയാണോ തെറ്റാണോ എന്ന് പറയേണ്ട ജഡ്ജിമാര് ഫയലിന്മേല് കിടന്നുറങ്ങി. സംസ്ഥാനങ്ങളെ കേന്ദ്രഭരണ പ്രദേശങ്ങളാക്കാന് സര്ക്കാരിന് അധികാരമുണ്ടെന്നാണ് കോടതിയുടെ നിലപാട്. നീതിന്യായ സംവിധാനത്തെ ഭയപ്പെടുത്തി കീഴ്പ്പെടുത്താനുളള ശ്രമങ്ങളാണ് രാജ്യത്ത് നടക്കുന്നത്. ഇത് പറയുമ്പോള് സുപ്രീംകോടതിക്കെതിരെ ഞാന് സംസാരിച്ചുവെന്ന് വാര്ത്ത വന്നേക്കാം. ബോധപൂര്വ്വം തന്നെയാണ് ഇത് പറയുന്നത്. ആരെങ്കിലുമൊക്കെ ഇത്തരം കാര്യങ്ങള് തുറന്നടിച്ച് പറയേണ്ടേ'- എം എ ബേബി പറഞ്ഞു.