ഡല്ഹി: ലക്ഷദ്വീപില് ഉപതെരഞ്ഞെടുപ്പ് നടത്താനുളള തീരുമാനം മരവിപ്പിച്ച് തെരഞ്ഞെടുപ്പ് കമ്മീഷന്. വധശ്രമക്കേസില് ലക്ഷദ്വീപ് മുന് എംപി മുഹമ്മദ് ഫൈസലിന്റെ ശിക്ഷ ഹൈക്കോടതി മരവിപ്പിച്ച പശ്ചാത്തലത്തിലാണ് നടപടി. മുഹമ്മദ് ഫൈസല് കുറ്റക്കാരനാണെന്ന വിചാരണാക്കോടതി ഉത്തരവ് ഹൈക്കോടതി മരവിപ്പിച്ചിരുന്നു. ശിക്ഷാവിധിയും കോടതി സസ്പെന്ഡ് ചെയ്തു. കേസില് ജയില്മോചിതനായതിനുശേഷം എംപി സ്ഥാനം പുനസ്ഥാപിക്കപ്പെടുമെന്ന് പ്രതീക്ഷിക്കുന്നതായി മുഹമ്മദ് ഫൈസല് പ്രതികരിച്ചിരുന്നു.
ലക്ഷദ്വീപില് ഉടന് ഉപതെരഞ്ഞെടുപ്പ് നടത്തുന്നതിന്റെ ആവശ്യകത എന്താണെന്നും ആര്ക്കാണ് ഉപതെരഞ്ഞെടുപ്പ് നടത്താന് ധൃതിയെന്നുമാണ് മുഹമ്മദ് ഫൈസല് ചോദിച്ചത്. 'തെരഞ്ഞെടുപ്പ് പെട്ടെന്ന് പ്രഖ്യാപിച്ചതിനുപിന്നില് ആരുടെയോ താല്പ്പര്യമുണ്ടെന്ന് കരുതുന്നു. ലക്ഷദ്വീപിലെ ഭരണപരിഷ്കാരത്തിനെതിരെ പ്രതികരിച്ചതുകൊണ്ടാണ് എനിക്കുപകരം ഒരാളെ അവിടെ സ്ഥാപിക്കണമെന്ന ധൃതി വരുന്നത്'- മുഹമ്മദ് ഫൈസല് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2009-ല് കോണ്ഗ്രസ് പ്രവര്ത്തകനെ വധിക്കാന് ശ്രമിച്ച കേസിലാണ് ലക്ഷദ്വീപ് എംപിയും എന്സിപി നേതാവുമായ മുഹമ്മദ് ഫൈസലിന് കോടതി പത്തുവര്ഷം തടവുശിക്ഷ വിധിച്ചത്. 2009-ല് നടന്ന ലോക്സഭാ തെരഞ്ഞെടുപ്പ് പ്രചാരണത്തിനിടെ ഒരു ഷെഡ് സ്ഥാപിച്ചതുമായി ബന്ധപ്പെട്ടുണ്ടായ സംഘര്ഷത്തില് മുഹമ്മദ് സാലിഹ് എന്ന കോണ്ഗ്രസ് പ്രവര്ത്തകനെ ആക്രമിച്ച് പരിക്കേല്പ്പിച്ചു എന്നാണ് കേസ്. മുന് കേന്ദ്രമന്ത്രിയും കോണ്ഗ്രസ് നേതാവുമായ പി എം സയ്യിദിന്റെ മകളുടെ ഭര്ത്താവാണ് സാലിഹ്.