അഹമ്മദാബാദ്: പാര്ട്ടി വിരുദ്ധ പ്രവര്ത്തനം നടത്തിയതിന് പ്രവര്ത്തകരെ സസ്പെന്ഡ് ചെയ്ത് കോണ്ഗ്രസ്. ഡിസംബറില് നടന്ന ഗുജറാത്ത് നിയമസഭാ തെരഞ്ഞെടുപ്പില് പാര്ട്ടിവിരുദ്ധ പ്രവര്ത്തനങ്ങള് നടത്തിയവര്ക്കെതിരെയാണ് നടപടിയെന്നും ആറുവര്ഷത്തേക്കാണ് സസ്പെന്ഷനെന്നും ഗുജറാത്ത് പിസിസി അറിയിച്ചു. സുരേന്ദ്രനഗര് ജില്ലാ പ്രസിഡന്റ് രായാഭായ് റാത്തോഡ്, നര്മ്മദ ജില്ലാ പ്രസിഡന്റ് ഹരേന്ദ്ര വാലണ്ട്, മുന് നന്ദോഡ് എംഎല്എ പി ഡി വാസവ എന്നിവരുള്പ്പെടെ 38 പേരെയാണ് പാര്ട്ടി സസ്പെന്ഡ് ചെയ്തത്.
ഗുജറാത്ത് കോണ്ഗ്രസിന്റെ അച്ചടക്ക സമിതി ഈ മാസം രണ്ടുതവണ യോഗം ചേര്ന്നെന്നും 95 പേര്ക്കെതിരെ 71 പരാതികള് ലഭിച്ചെന്നും കണ്വീനര് ബാലു പട്ടേല് പറഞ്ഞു. 'പാര്ട്ടി വിരുദ്ധ പ്രവര്ത്തനങ്ങളുടെ പേരില് 38 പേരെ സസ്പെന്ഡ് ചെയ്തു. എട്ട് പ്രവര്ത്തകര്ക്ക് മുന്നറിയിപ്പ് നല്കിയിട്ടുണ്ട്. ബാക്കിയുളളവര്ക്കെതിരെ നടപടിയുണ്ടാകും'- ബാലു പട്ടേല് കൂട്ടിച്ചേര്ത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2022 ഡിസംബര് 1,5 തിയതികളിലായി നടന്ന ഗുജറാത്ത് നിയമസഭാ തെരഞ്ഞെടുപ്പില് 156 സീറ്റുകള് നേടിയാണ് ബിജെപി അധികാരം പിടിച്ചെടുത്തത്. കോണ്ഗ്രസിന് 19 സീറ്റുകള് മാത്രമാണ് നേടാനായത്. തുടര്ന്ന് ഗുജറാത്ത് തെരഞ്ഞെടുപ്പ് ഫലം വിലയിരുത്താന് കോണ്ഗ്രസ് വസ്തുതാന്വേഷണ സമിതി രൂപീകരിച്ചിരുന്നു.നിതിന് റാവത്ത്, ഷക്കീല് അഹമ്മദ് ഖാന്, സപ്തഗിരി ശങ്കര് ഉലക എന്നിവരടങ്ങുന്ന മൂന്നംഗ സമിതിയെയാണ് തെരഞ്ഞെടുപ്പ് ഫലം വിലയിരുത്തുന്നതിനും തുടര്നടപടികള് നിര്ദേശിക്കുന്നതിനുമായി പാര്ട്ടി ചുമതലപ്പെടുത്തിയത്.