വാഷിംഗ്ടണ്‍: വീണ്ടും അമേരിക്കന്‍ പ്രസിഡന്റ് സ്ഥാനത്തേക്ക് മത്സരിച്ചേക്കുമെന്ന് സൂചന നല്‍കി മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ടെക്‌സസില്‍ നടന്ന റാലിയെ അഭിസംബോധന ചെയ്യവേയാണ് അദ്ദേഹം ഇക്കാര്യം പറഞ്ഞത്. 2020-ലെ യുഎസ് തെരഞ്ഞെടുപ്പിലെ പരാജയം ട്രംപ് ഇനിയും അംഗീകരിച്ചിട്ടില്ല.
'ഞാന്‍ രണ്ടുതവണ മത്സരിച്ചു. ആ രണ്ട് തവണയും വിജയിച്ചു. ആദ്യത്തെ തവണത്തേക്കാള്‍ മികച്ച വിജയം രണ്ടാമത്തേതില്‍ നേടി. 2016-നെ അപേക്ഷിച്ച് 2020-ല്‍ ദശലക്ഷക്കണക്കിന് വോട്ടുകളാണ് കൂടുതല്‍ ലഭിച്ചത്. നമ്മുടെ രാജ്യത്തിന്റെ ചരിത്രത്തില്‍ ഇതുവരെയുളള ഏതൊരു പ്രസിഡന്റിനേക്കാളും കൂടുതല്‍ വോട്ട് എനിക്ക് ലഭിച്ചു. ഇപ്പോള്‍, നമ്മുടെ രാജ്യത്തിന്റെ വിജയത്തിനും സുരക്ഷിതത്വത്തിനും വേണ്ടി ഒരുപക്ഷേ ഞാനത് വീണ്ടും ചെയ്യേണ്ടിവരും'- ഡൊണാള്‍ഡ് ട്രംപ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യു
നേരത്തെയും താന്‍ അടുത്ത പ്രസിഡന്റ് തെരഞ്ഞെടുപ്പില്‍ മത്സരിക്കുമെന്ന തരത്തില്‍ ഡൊണാള്‍ഡ് ട്രംപ് സൂചന നല്‍കിയിരുന്നു. ടെക്‌സാസിലെ പ്രതികരണത്തോടെ അദ്ദേഹം മത്സരിക്കുമെന്ന് ഏറെക്കുറെ ഉറപ്പായിരിക്കുകയാണ്. ക്യാപ്പിറ്റല്‍ ഹില്‍ കലാപത്തില്‍ ട്രംപിന് പങ്കുണ്ടെന്ന് ആരോപിച്ച് ഹൗസ് സെലക്ട് കമ്മിറ്റി കേസന്വേഷിക്കുന്ന സമിതിക്കുമുന്‍പാകെ ഹാജരാകാന്‍ ആവശ്യപ്പെട്ടതിനുപിന്നാലെയാണ് പ്രസിഡന്റ് തെരഞ്ഞെടുപ്പില്‍ മത്സരിക്കുമെന്ന് ട്രംപ് സൂചന നല്‍കുന്നത്.
