ഡല്ഹി: തന്റെ ജന്മദിനം ആഘോഷിക്കരുതെന്ന് പ്രവര്ത്തകര്ക്ക് നിര്ദേശം നല്കി ഇന്ത്യന് നാഷണല് കോണ്ഗ്രസ് നേതാവ് രാഹുല് ഗാന്ധി. രാജ്യത്തെ യുവാക്കള് വേദനയോടെ തെരുവില് പ്രതിഷേധിക്കുകയാണെന്നും കോണ്ഗ്രസ് പ്രവര്ത്തകര് ഇപ്പോള് അവര്ക്കൊപ്പം നില്ക്കുകയാണ് ചെയ്യേണ്ടതെന്നും രാഹുല് ഗാന്ധി പറഞ്ഞു. കേന്ദ്രസര്ക്കാരിന്റെ അഗ്നിപഥ് പദ്ധതിക്കെതിരെ രാജ്യത്തെ യുവാക്കളുടെ പ്രതിഷേധം ശക്തമായി തുടരുന്ന സാഹചര്യത്തിലാണ് പിറന്നാള് ആഘോഷങ്ങള് വേണ്ടെന്ന രാഹുലിന്റെ നിര്ദേശം. ഇന്ന് രാഹുല് ഗാന്ധിയുടെ 52-ാം ജന്മദിനമാണ്. എ ഐ സി സി ജനറല് സെക്രട്ടറി ജയ്റാം രമേശാണ് രാഹുല് ഗാന്ധിയുടെ പേരിലുളള പത്രക്കുറിപ്പ് ട്വിറ്ററില് പങ്കുവെച്ചത്.
'രാജ്യത്ത് നിലവിലുളള സാഹചര്യം ആശങ്കാജനകമാണ്. കോടിക്കണക്കിന് യുവാക്കള് ദുഖത്തിലാണ്. ഈ സമയത്ത് നമ്മള് അവര്ക്കും അവരുടെ കുടുംബങ്ങള്ക്കുമൊപ്പമാണ് നില്ക്കേണ്ടത്. എന്റെ ജന്മദിനത്തില് ഒരു തരത്തിലുളള ആഘോഷങ്ങളും നടത്തരുതെന്ന് എല്ലാ കോണ്ഗ്രസ് പ്രവര്ത്തകരോടും രാജ്യത്തുടനീളമുളള എന്റെ അഭ്യുദയകാംഷികളോടും ഞാന് അഭ്യര്ത്ഥിക്കുന്നു'-എന്നാണ് രാഹുല് ഗാന്ധി പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കാര്ഷിക നിയമങ്ങള് പിന്വലിച്ചതുപോലെ മോദി സര്ക്കാരിന് അഗ്നിപഥ് പദ്ധതിയും പിന്വലിക്കേണ്ടിവരുമെന്ന് രാഹുല് ഗാന്ധി കഴിഞ്ഞ ദിവസം പറഞ്ഞിരുന്നു. 'കഴിഞ്ഞ എട്ടുവര്ഷങ്ങളായി ബിജെപി സര്ക്കാര് ജയ് ജവാന് ജയ് കിസാന് മൂല്യങ്ങളെ അവഹേളിക്കുകയാണ്. പ്രധാനമന്ത്രിക്ക് കാര്ഷിക നിയമങ്ങള് പിന്വലിക്കേണ്ടിവരുമെന്ന് ഞാന് നേരത്തെ പറഞ്ഞിരുന്നു. അതുപോലെ അദ്ദേഹത്തിന് രാജ്യത്തെ യുവാക്കളോടും മാപ്പുപറയേണ്ടിവരും. മോദി 'മാഫീവീര്' ആയിത്തീരും. അദ്ദേഹത്തിന് അഗ്നിപഥ് പദ്ധതി പിന്വലിക്കേണ്ടിവരും' എന്നായിരുന്നു രാഹുല് ഗാന്ധിയുടെ ട്വീറ്റ്.