തിരുവനന്തപുരം: കൊറോണാബാധ തടയാന്‍ കാസര്‍ഗോഡ്‌ ജില്ലക്കായി പ്രത്യേക ആക്ഷന്‍ പ്ലാന്‍ രൂപപ്പെടുത്തിയിട്ടുണ്ടെന്നും ജില്ലയില്‍ പ്രവര്‍ത്തിക്കുന്ന സെന്‍ട്രല്‍ യൂണിവേഴ്സിറ്റിയില്‍ കൊറോണ ടെസ്റ്റ്‌ നടത്താന്‍ അനുമതി ലഭിച്ചിട്ടുണ്ടെന്നും മുഖ്യമന്ത്രി അറിയിച്ചു.
ജില്ലയിലെ ഓരോ പഞ്ചായത്തില്‍ നിന്നും വിവരങ്ങള്‍ ശേഖരിക്കും. സംശയം തോന്നുവരെ ഉടന്‍ തന്നെ നിരീക്ഷണത്തിലേക്ക് മാറ്റാനും സ്രവ പരിശോധന വേഗത്തിലാക്കാനുമുള്ള സംവിധാനമുണ്ടാക്കും. ചുമയും പനിയും ഉള്ളവരുടെ പട്ടിക തയാറാക്കി സൂക്ഷ്മ നിരീക്ഷണം നടത്തും. കാസര്‍ഗോഡ്‌ മെഡിക്കല്‍ കോളേജില്‍ കൊറോണ ചികിത്സാ കേന്ദ്രം ഉടന്‍ ആരംഭിക്കും.കാസര്‍ഗോഡ്‌ ജില്ലയില്‍ മാസ്ക്കുകള്‍ അടക്കമുള്ള കാര്യങ്ങള്‍ക്ക് യാതൊരുവിധ ക്ഷാമവും ഇല്ലായെന്നും മുഖ്യമന്ത്രി വ്യക്തമാക്കി.
