കണ്ണൂര്: തലശേരിയിലെ ബിജെപി പ്രവര്ത്തകരുടെ വിദ്വേഷ മുദ്രാവാക്യം വിളിയില് കേസെടുത്ത് പൊലീസ്. അഞ്ചുനേരം നിസ്കരിക്കാന് പളളികളൊന്നും കാണില്ലെന്നും ബാങ്കുവിളികള് കേള്ക്കില്ലെന്നും ആക്രോശിച്ചുകൊണ്ട് റാലി നടത്തുന്ന ഒരുസംഘം ബിജെപി പ്രവര്ത്തകരുടെ വീഡിയോ സമൂഹമാധ്യമങ്ങളില് വന്തോതില് പ്രചരിച്ചിരുന്നു. അതിന്റെ അടിസ്ഥാനത്തിലാണ് പൊലീസ് സ്വമേധയാ കേസെടുത്തത്. കണ്ടാലറിയാവുന്ന 25 ബിജെപി പ്രവര്ത്തകര്ക്കെതിരെയാണ് കേസ്.
മതസ്പര്ധ വളര്ത്തല്, കലാപത്തിന് ആഹ്വാനം ചെയ്യല് തുടങ്ങിയ കുറ്റങ്ങള് ചുമത്തി ഐപിസി 143, 147, 153 എ, 149 എന്നീ വകുപ്പുകള് ചേര്ത്താണ് പൊലീസ് കേസെടുത്തിരിക്കുന്നത്. കെ ടി ജയകൃഷ്ണന് അനുസ്മരണത്തിന്റെ ഭാഗമായി യുവമോര്ച്ച കണ്ണൂര് ജില്ലാ കമ്മിറ്റി തലശേരിയില് സംഘടിപ്പിച്ച റാലിക്കിടെയാണ് വര്ഗീയതയും വിദ്വേഷവും പടര്ത്തുന്ന മുദ്രാവാക്യങ്ങള് ഉയര്ന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നിസ്കരിക്കാന് പളളികള് കാണില്ല, ബാങ്കുവിളികള് കേള്ക്കില്ല, ജയകൃഷ്ണനെ വെട്ടിയവര് ആയുസൊടുങ്ങി മരിക്കില്ല. ആര്എസ്എസിന്റെ കോടതി അവര്ക്കുളള ശിക്ഷ നടപ്പാക്കും എന്നടക്കം പ്രകോപനപരമായ മുദ്രാവാക്യങ്ങളായിരുന്നു റാലിയിലുടനീളം മുഴക്കിയത്. ബിജെപി സംസ്ഥാന നേതാക്കളും പൊലീസും നോക്കിനില്ക്കെയായിരുന്നു വിദ്വേഷ മുദ്രാവാക്യങ്ങളുയര്ന്നത്.