തിരുവനന്തപുരം: സംസ്ഥാനത്ത് ഇന്നും (നവംബര് -14 ഞായര്) വ്യാപക മഴക്ക് സാധ്യതയെന്ന് കാലാവസ്ഥാ വകുപ്പിന്റെ മുന്നറിയിപ്പ്. ഏഴു ജില്ലകളില് ഓറഞ്ച് അലേര്ട്ടും ഏഴ് ജില്ലകളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, ആലപ്പുഴ, കാസര്ഗോഡ് ജില്ലകളിലാണ് ഓറഞ്ച് അലേര്ട്ട്. അറബിക്കടലിലുണ്ടായ ചക്രവാതച്ചുഴിയും ബംഗാള് ഉള്ക്കടലിലെ ന്യൂനമര്ദ്ദവും തുടരുകയാണ്. ഇന്നലെ മഴ വന് നാശനഷ്ടമുണ്ടാക്കിയ തിരുവനന്തപുരം ജില്ലയില് ഇപ്പോള് നേരിയ ആശ്വാസമുണ്ട്.
തിരുവനന്തപുരത്ത് 33 ദുരിതാശ്വാസ ക്യാംപുകളിലായി 573 പേരെ മാറ്റിപ്പാര്പ്പിച്ചിട്ടുണ്ട്. ജില്ലയില് വിനോദസഞ്ചാരം, ക്വാറി, മൈനിംഗ് പ്രവര്ത്തനങ്ങളെല്ലാം നിര്ത്തിവച്ചിരിക്കുകയാണ്. നെയ്യാര്, അരുവിക്കര, പേപ്പാറ ഡാമുകളുടെ ഷട്ടറുകള് ഉയര്ത്തിയിട്ടുളളതിനാല് സമീപവാസികള് അതീവ ജാഗ്രത പുലര്ത്തണമെന്ന് ജില്ലാ കളക്ടര് അറിയിച്ചു. മത്സ്യബന്ധനത്തിന് വിലക്കുണ്ട്. ചൊവ്വാഴ്ച്ച വരെ കനത്ത മഴ തുടരും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പത്തനംതിട്ട ജില്ലയില് അതീവ ജാഗ്രതാ നിര്ദേശം പുറപ്പെടുവിച്ചിട്ടുണ്ട്. നദീതീരങ്ങളിലും, മണ്ണിടിച്ചില്, ഉരുള്പൊട്ടല് എന്നിവയ്ക്ക് സാധ്യതയുളള പ്രദേശങ്ങളിലും താമസിക്കുന്നവര് ജാഗ്രത പുലര്ത്തണം. വെളളപ്പൊക്ക സാധ്യതയുളള മേഖലയിലെ ആളുകള് ആവശ്യമെങ്കില് മാറിത്താമസിക്കാന് സജ്ജരാകണമെന്നും നിര്ദേശമുണ്ട്.
അതേസമയം, മുല്ലപ്പെരിയാര് അണക്കെട്ടിലേക്കുളള നീരൊഴുക്ക് വര്ധിച്ചിട്ടുണ്ട്. ജലനിരപ്പ് 140 അടിയിലെത്തി. ഡാം ഷട്ടറുകള് ഇരുപത്തിനാല് മണിക്കൂറിനുളളില് തുറക്കും. പെരിയാര് തീരത്തുളളവര് ജാഗ്രത പാലിക്കണം. ഇടുക്കി അണക്കെട്ടിലും ജലനിരപ്പ് ഉയര്ന്നിട്ടുണ്ട്.