കർണാടയിലെ ബിജെപി എംപിയുടെ മകൾക്ക് കൊവിഡ്-19 സ്ഥിരീകരിച്ചു. ദാവൻഗരെ എംപി ജി.എം സിദ്ധേശ്വരയുടെ മകൾ അശ്വിനിക്കാണ് അസുഖം സ്ഥിരീകരിച്ചത്. ഗയാനയിൽ താമസമാക്കിയ അശ്വിനി കഴിഞ്ഞ ദിവസമാണ് ബംഗളൂരുവിൽ എത്തിയത്. ന്യൂയോർക്ക് വഴി ഡൽഹിയിൽ ആദ്യം എത്തി. അവിടെ നിന്നാണ് ബംഗളൂരുവിലേക്ക് തിരിച്ചത്.
സിദ്ധേശ്വരയുടെ പരിശോധനാ ഫലം നെഗറ്റീവാണ്. അതേ സമയം അശ്വനിക്കൊപ്പം യാത്രചെയ്ത രണ്ടു കുട്ടികളുടെ പ ഫലം ഇനിയും പുറത്ത് വരാനുണ്ട്. കുട്ടികൾ വീട്ടിൽ നിരീക്ഷണത്തിലാണ്.
മധ്യപ്രദേശിൽ മാധ്യമ പ്രവർത്തകന് കൊവിഡ്-19 സ്ഥിരീകരിച്ചു. മകളുടെ വിവാഹത്തിന് ഇയാൾ വിദേശത്ത് പോയിരുന്നു. മകളും രോഗ ബാധിതയാണ്. മുൻമുഖ്യമന്ത്രി കമൽനാഥിന്റെ വാർത്താ സമ്മേളനത്തിൽ ഇയാൾ സംബന്ധിച്ചിരുന്നു. കമൽനാഥ് മുഖ്യമന്ത്രി സ്ഥാനം രാജിവെക്കുന്നതിന് മുൻപ് വിളിച്ചു ചേർത്ത വാർത്ത സമ്മേളനത്തിലാണ് ഇയാൾ പങ്കെടുത്തത്. ഇതിനെ തുടർന്ന് മധ്യപ്രദേശിലെ 200 ഓളം മാധ്യമ പ്രവർത്തകരെ നിരീക്ഷണത്തിലാക്കി. നിരീക്ഷണത്തിലായവരിൽ സാങ്കേതിക പ്രവർത്തകരും ഉൾപ്പെടും.
മധ്യപ്രദേശിൽ കൊവിഡ്-19 സ്ഥിരീകരിച്ചവരുടെ എണ്ണം 15 ആയി. നേരത്തെ കൊവിഡ്-19 പൊസീറ്റിവ് ആയ 26 കാരിയുടെ അച്ഛനാണ് രോഗം സ്ഥിരീകരിച്ചത്. ഭോപാലിലാണ് ഇരുവരും ചികിത്സയിൽ ഉള്ളത്.