തിരുവനന്തപുരം: കേരളത്തിലെ നിയമസഭാ തെരഞ്ഞെടുപ്പ് പരാജയത്തിനു കാരണം ആര് എസ് എസ്സെന്ന് ബിജെപി അവലോകന റിപ്പോര്ട്ട്. തെരഞ്ഞെടുപ്പ് പ്രചരണമാരംഭിച്ചപ്പോള് മുതല് ആര് എസ് എസ് വിട്ടുനില്ക്കുകയായിരുന്നുവെന്നും റിപ്പോര്ട്ടില് പറയുന്നു. തെരഞ്ഞെടുപ്പ് സഹായത്തിനായി നിയോഗിച്ചവര് പരാജയമായിരുന്നുവെന്നും റിപ്പോര്ട്ടില് വ്യക്തമാക്കുന്നു.
കേരളത്തിലെ തെരഞ്ഞെടുപ്പ് അവലോകന റിപ്പോര്ട്ട് ബിജെപി സംസ്ഥാന അദ്ധ്യക്ഷന് കെ സുരേന്ദ്രന് സംഘടനാ ചുമതലയുള്ള ജനറല് സെക്രട്ടറി ബി എല് സന്തോഷിന് കൈമാറി. സംസ്ഥാന നേതാക്കളായ എ എന് രാധാകൃഷ്ണന്, എം ടി രമേശ്, സി കൃഷ്ണകുമാര്, സുധീന് എന്നിവര് ഉള്പ്പെട്ട ഉപസമിതിയാണ് തെരഞ്ഞെടുപ്പ് അവലോകന റിപ്പോര്ട്ട് തയ്യാറാക്കിയത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കഴിഞ്ഞ നിയമസഭാ തെരെഞ്ഞെടുപ്പില് ബിജെപിക്ക് വലിയ പരാജയമാണ് നേരിടേണ്ടിവന്നത്. 2016-ല് എന്.ഡി.എക്ക് കേരളത്തില് 14.93 ശതമാനമായിരുന്നു വോട്ട്. 2021-ലെ നിയമസഭാ തെരഞ്ഞെടുപ്പില് അത് 12.47 ശതമാനമായി ചുരുങ്ങിയിരുന്നു. നേമം സീറ്റും ഇത്തവണ ബിജെപിക്ക് നഷ്ടമായിരുന്നു. പാലക്കാട്ട് മുന് ഡി എം ആര് സി തലവന് ഇ ശ്രീധരനെ വെച്ച് മികച്ച പ്രകടനം കാഴ്ചവെക്കുവാന് സാധിച്ചുവെങ്കിലും, ആകെയുള്ള നേമം സീറ്റ് നഷ്ടമായി.കേരളാ നിയമസഭയില് 2016 ല് തുറന്ന അക്കൗണ്ട് പോലും പാര്ട്ടിക്ക് നിലനിര്ത്താനായില്ല.
ബി.ജെ.പിയുടെ തോല്വിയുടെ ഉത്തരവാദിത്തം സംസ്ഥാന നേതൃത്വം ഏറ്റെടുക്കണമെന്ന് നേരത്തെ ബി ജെ പി കോര്കമ്മറ്റി യോഗത്തില് ആവശ്യമുയര്ന്നിരുന്നു.എന്നാല് ഈ ആവശ്യം വി. മുരളീധരന് പക്ഷം തള്ളുകയായിരുന്നു.