ഡല്ഹി: വിവാദ കാര്ഷിക നിയമങ്ങള്ക്കെതിരായ പ്രതിഷേധത്തിനിടെ കര്ഷകര് മരിക്കാനിടയായ സാഹചര്യം ചൂണ്ടിക്കാട്ടി മുന് ബിജെപി എംഎല്എ രാജി വെച്ചു. ഫിറോസ്പൂര് മണ്ഡലത്തില് നിന്ന് രണ്ടുതവണ എംഎല്എയായ സുഖ്പാല് സിംഗ് നന്നുവാണ് പാര്ട്ടി വിട്ടത്. കാര്ഷിക നിയമങ്ങള്ക്കെതിരായ കര്ഷകരുടെ പ്രതിഷേധത്തിനിടെ നിരവധി കര്ഷകരാണ് മരണമടഞ്ഞത്. അതില് തന്നെ പിന്തുണയ്ക്കുന്നവര് അസ്വസ്ഥരാണ്. 2022ല് തെരഞ്ഞെടുപ്പ് നടക്കുന്നതിനുമുന്പ് ശക്തമായ തീരുമാനമെടുക്കണമെന്ന സമ്മര്ദ്ദമുണ്ടായിരുന്നു. അതിന്റെ ഭാഗമായാണ് ബിജെപിയില് നിന്ന് രാജി വെക്കാന് തീരുമാനിച്ചതെന്ന് അദ്ദേഹം മാധ്യമങ്ങളോട് പറഞ്ഞു.
പഞ്ചാബിലെ പാര്ട്ടി നേതൃത്വം യഥാര്ത്ഥ അവസ്ഥയെക്കുറിച്ച് കേന്ദ്രത്തിന് വ്യക്തമായ ചിത്രം നല്കിയിട്ടില്ല. കേന്ദ്രസര്ക്കാര് കാര്ഷിക നിയമങ്ങള് പാസാക്കിയ നാള് മുതല് അതിനെ എതിര്ക്കുന്നയാളാണ് താന് എന്നും അദ്ദേഹം കൂട്ടിച്ചേര്ത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2020 നവംബര് 26-നാണ് ഡല്ഹിയില് വിവാദ കാര്ഷികനിയമങ്ങള്ക്കെതിരായ കര്ഷകരുടെ പ്രതിഷേധം ആരംഭിച്ചത്. സമരം ഒന്പതാം മാസത്തിലേക്ക് കടന്നിട്ടും കേന്ദ്രസര്ക്കാരിന്റെ ഭാഗത്തുനിന്നും അവഗണന മാത്രമാണ് കര്ഷകര്ക്ക് ലഭിക്കുന്നത്. സമരത്തിന്റെ തുടക്കത്തില് പൊലീസിനെ ഉപയോഗിച്ച് അടിച്ചമര്ത്താന് ശ്രമിക്കുകയും കര്ഷകര് ഖാലിസ്ഥാനികളും തീവ്രവാദികളുമാണെന്ന് മുദ്രകുത്താന് ശ്രമിക്കുകയും ചെയ്തെങ്കിലും അത് പരാജയപ്പെട്ടു. പിന്നീട് ബിജെപി സര്ക്കാര് കര്ഷകരുമായി ഒത്തുതീര്പ്പുചര്ച്ചകള് നടത്തി. പതിനൊന്ന് ഒത്തുതീര്പ്പുചര്ച്ചകളും പരാജയപ്പെടുകയായിരുന്നു. നിയമങ്ങളില് ഭേദഗതികളാവാം എന്നാല് പിന്വലിക്കില്ലെന്നാണ് കേന്ദ്രസര്ക്കാരിന്റെ പക്ഷം. എന്നാല് നിയമങ്ങള് പിന്വലിക്കാതെ പ്രതിഷേധത്തില് നിന്ന് പിന്നോട്ടില്ലെന്ന നിലപാടില് ഉറച്ചുനില്ക്കുകയാണ് കര്ഷകര്.