ചെന്നൈ: നടന്‍ വിജയ്ക്ക് ഒരു ലക്ഷം രൂപ പിഴ വിധിച്ച് മദ്രാസ് ഹൈക്കോടതി. ഒരു ലക്ഷം രൂപ പിഴ രണ്ടാഴ്ച്ചയ്ക്കുളളില്‍ മുഖ്യമന്ത്രിയുടെ ദുരിതാശ്വാസനിധിയിലടക്കണമെന്ന് കോടതി പറഞ്ഞു. ഇംഗ്ലണ്ടില്‍ നിന്ന് ഇറക്കുമതി ചെയ്ത ആഡംബരക്കാറിന് പ്രവേശന നികുതി ചുമത്തിയതിനെതിരെ നടന്‍ കോടതിയെ സമീപിച്ചിരുന്നു. റോള്‍സ് റോയ്‌സ് കാറിന് പ്രവേശന നികുതി ചുമത്തിയത് ചോദ്യം ചെയ്ത് വിജയ് സമര്‍പ്പിച്ച ഹര്‍ജി മദ്രാസ് ഹൈക്കോടതി തളളി. ജസ്റ്റിസ് എസ്. എം. സുബ്രമണ്യന്‍ അധ്യക്ഷനായ ബെഞ്ച് നടനെ രൂക്ഷമായ ഭാഷയില്‍ വിമര്‍ശിക്കുകയും ചെയ്തു.
കോടികള്‍ വിലമതിക്കുന്ന റോള്‍സ് റോയ്‌സ് കാറിന് പ്രത്യേക നികുതിയിളവ് നല്‍കണമെന്നാവശ്യപ്പെട്ടാണ് വിജയ് കോടതിയെ സമീപിച്ചത്. സിനിമയിലെ സൂപ്പര്‍ ഹീറോ ജീവിതത്തില്‍ വെറും റീല്‍ ഹീറോയായി മാറരുതെന്നും നികുതി അടച്ച് കൃത്യമായി ആരാധകര്‍ക്ക് മാതൃകയാവണമെന്നും ജസ്റ്റിസ് എസ്. എം സുബ്രമണ്യന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
വിജയ് അഭിനയിക്കുന്ന ചിത്രങ്ങളെല്ലാം അഴിമതിക്കെതിരെയുളളതാണ്. അത്തരം വേഷങ്ങളിലൂടെയാണ് അദ്ദേഹത്തിന് ആരാധകരുണ്ടായതും. അദ്ദേഹം നികുതി വെട്ടിപ്പ് നടത്തുന്നത് അംഗീകരിക്കാനാവില്ല. തന്റെ ചിത്രങ്ങള്‍ കാണാനായി ടിക്കറ്റെടുക്കുന്ന ആരാധകരെ വിജയ്ക്ക് ഓര്‍ക്കാമായിരുന്നു. അവര്‍ ടിക്കറ്റെടുത്ത് സിനിമ കാണുന്നതുകൊണ്ടാണ് വിജയ്ക്ക് ആഢംബര കാര്‍ വാങ്ങാനായത്. സാധാരണക്കാര്‍ നികുതി അടച്ച് നിയമം പാലിച്ച് ജീവിക്കുമ്പോള്‍ സമൂഹത്തില്‍ അറിയപ്പെടുന്നവര്‍ ഇത്തരത്തില്‍ പ്രവര്‍ത്തിക്കുന്നത് തെറ്റായ സന്ദേശം നല്‍കുന്നുവെന്നും ജസ്റ്റിസ് സുബ്രമണ്യന്‍ കൂട്ടിച്ചേര്‍ത്തു.
