ബാഗ്ദാദ്: ചരിത്രസന്ദര്ശനത്തില് ഇറാഖിലെ ക്രിസ്ത്യാനികളുടെ സുരക്ഷയെക്കുറിച്ച് ചര്ച്ച ചെയ്ത് ഫ്രാന്സിസ് മാര്പാപ്പ. ഇറാഖിലെ ഷിയ മുസ്ലീങ്ങളുടെ പരമോന്നത നേതാവായ അയത്തൊളള സിസ്താനിയുമായാണ് മാര്പാപ്പ ചര്ച്ച നടത്തിയത്. ഒരു മണിക്കൂറോളം നീണ്ട ചര്ച്ചയില് ഇറാഖിലെ ന്യൂനപക്ഷമായ ക്രിസ്ത്യാനികളുടെ ജീവിതത്തെക്കുറിച്ചാണ് പ്രധാനമായും അദ്ദേഹം സംസാരിച്ചത്.
രാജ്യത്തെ മറ്റെല്ലാ മതവിഭാഗങ്ങളെയും പോലെ ക്രിസ്ത്യാനികള്ക്കും സമാധാനവും സുരക്ഷയുമുണ്ടാവണം. അവര്ക്കും ഭരണഘടനാപരമായ എല്ലാ അവകാശങ്ങളും ഉണ്ടായിരിക്കണമെന്നും ഫ്രാന്സിസ് മാര്പാപ്പ ആവശ്യപ്പെട്ടതായി അയത്തൊളള സിസ്താനി പറഞ്ഞു. ഇറാഖിന്റെ സമീപകാല ചരിത്രത്തില് ഏറ്റവും അക്രമാസക്തമായ കാലഘട്ടത്തിലൂടെ കടന്നുപോകുമ്പോള് ദുര്ബലരും പീഡിപ്പിക്കപ്പെടുന്നവരുമായ ജനതയ്ക്കുവേണ്ടി ശബ്ദമുയര്ത്തിയതിന് ഫ്രാന്സിസ് മാര്പാപ്പ അയത്തൊളള സിസ്താനിയോട് നന്ദി പറഞ്ഞു.
സിസ്താനിയുമായുളള ചര്ച്ചയ്ക്കുശേഷം മാര്പാപ്പ എബ്രഹാം നബിയുടെതെന്ന് വിശ്വസിക്കപ്പെടുന്ന പുരാതര നഗരമായ ഉര്-ലേക്കാണ് പോയത്. പതിനായിരത്തോളം പേരടങ്ങുന്ന ഇറാഖി സേനയെയാണ് മാര്പാപ്പയുടെ സന്ദര്ശനത്തോടനുബന്ധിച്ച് വിന്യസിച്ചിട്ടുളളത്.