ചമോലി: മഞ്ഞുമല ഇടിഞ്ഞ് പ്രളയവും അപകടവുമുണ്ടായ ഉത്തരാഖണ്ഡ് സംസ്ഥാനത്തെ ചമോലിയില്‍ ഇതുവരെ 26 പേരുടെ മൃതദേഹങ്ങള്‍ കണ്ടെടുത്തു. രാത്രി മുഴുവന്‍ നീണ്ടുനിന്ന രക്ഷാപ്രവര്‍ത്തനത്തിലൂടെയാണ് മൃതദേഹങ്ങള്‍ കണ്ടെടുത്തത്. അപകടത്തില്‍പെട്ട 171 പേരെ ഇതുവരെ കണ്ടെത്താനായിട്ടില്ല. 35 പേര്‍ രക്ഷാപ്രവര്‍ത്തകര്‍ക്ക് എത്താന്‍ കഴിയാത്ത തുരങ്കത്തില്‍ കുടുങ്ങിക്കിടക്കുകയാണ് എന്നാണ് റിപ്പോര്‍ട്ട്. ഇവരെ രക്ഷിക്കാനുള്ള പ്രവര്‍ത്തനം തുടരുകയാണ്.
അണക്കെട്ടിന്റെ തുരങ്കത്തിലൂടെ അതിസാഹസികമായി കടന്നാണ് രാക്ഷാപ്രവര്‍ത്തനം നടത്തുന്നത്. വന്‍ യന്ത്രങ്ങള്‍ ഉപയോഗപ്പെടുത്തിയാണ് അപകടസ്ഥലത്തെ ചെളി നീക്കം ചെയ്യുന്നത്. വ്യോമസേന, ഇന്‍ഡോ- ടിബറ്റന്‍ ബോര്‍ഡര്‍ ഫോഴ്സ്, ഫയര്‍ ഫോഴ്സ്, ലോക്കല്‍ പോലിസ് സേനാംഗങ്ങള്‍ തുടങ്ങിയവര്‍ രക്ഷാപ്രവര്‍ത്തനത്തില്‍ സജീവമാണ്.
അണക്കെട്ട് ഒലിച്ചുപോയി
മഞ്ഞുമലയിടിച്ചിലില്‍ തപോവന്‍ വിഷ്ണുഘട്ട് വൈദ്യുതി നിലയം ഒലിച്ചുപോയി. 52 മെഗാവാട്ട് വൈദ്യുതി ഉത്പാദിപ്പിക്കാന്‍ ശേഷിയുള്ള ഈ ഹൈഡ്രോ പ്രൊജക്റ്റ്‌ പൂര്‍ണ്ണമായും നശിച്ചു. 3000 കോടി രൂപ ചെലവുചെയ്ത് നിര്‍മ്മിച്ചതാണ് അണക്കെട്ട്. തൂങ്ങി നില്‍ക്കുന്ന മഞ്ഞുപാളികള്‍ ഉരുകി തകര്‍ന്നുവീണാണ് അപകടമുണ്ടായത് എന്നാണു പ്രാഥമിക നിഗമനമെന്നു ഡിആര്‍ഡിഒ റിസര്‍ച്ച് വിഭാഗം തലവന്‍ എന്‍ കെ സിന്‍ഹയെ പറഞ്ഞു.
