ഭോപ്പാല്‍: മധ്യപ്രദേശ് വിഷമദ്യ ദുരന്തത്തില്‍ മരിച്ചവരുടെ എണ്ണം ഇരുപത് ആയി. ബുധനാഴ്ച്ച ആറുപേര്‍ കൂടി മരിച്ചതോടെയാണ് മരണസംഖ്യ ഉയര്‍ന്നത്. മധ്യപ്രദേശ് മൊറേനയിലെ മന്‍പൂര്‍ പൃഥ്വി, പഹാവലി ഗ്രാമങ്ങളില്‍ ഉണ്ടായ ദുരന്തം ഒഴിവാക്കുന്നതില്‍ പരാജയപ്പെട്ട ജില്ലാ കളക്ടറെയും പോലീസ് സൂപ്രണ്ടിനെയും സ്ഥലം മാറ്റാന്‍ മുഖ്യമന്ത്രി ശിവ് രാജ് ചൗഹാന്‍ ഉത്തരവിട്ടു.
സംസ്ഥാനത്ത് അനധികൃത മദ്യവില്‍പ്പനക്കെതിരായ പ്രചാരണത്തിന് തുടക്കമിട്ടതായും അദ്ദേഹം വ്യക്തമാക്കി. മൊറേന, ഗ്വാളിയാര്‍ ജില്ല ആശുപത്രികളിലായി 17 പേര്‍ നിലവില്‍ ചികിത്സയിലുണ്ട്. ഇവരില്‍ രണ്ടുപേരുടെ നില ഗുരുതരമായി തുടരുകയാണെന്ന് അധികൃതര്‍ വ്യക്തമാക്കി.
സംഭവത്തില്‍ രണ്ടുപേരെ അറസ്റ്റ് ചെയ്തിട്ടുണ്ട്. അഞ്ച് പേര്‍ ഒളിവിലാണ്. ഒളിവില്‍ പോയവരെ കണ്ടെത്താന്‍ സഹായിക്കുന്നവര്‍ക്ക് പതിനായിരം രൂപ പാരിതോഷികം പ്രഖ്യാപിച്ചിട്ടുണ്ടെന്ന് ജില്ലാ ഭരണകൂടം അറിയിച്ചു. കഴിഞ്ഞ മൂന്നുമാസത്തിനിടെ മധ്യപ്രദേശില്‍ ഉണ്ടായ രണ്ടാമത്തെ വ്യാജമദ്യ ദുരന്തമാണ് മൊറേനയിലേത്.
