ഡല്‍ഹി: ജിയോ ടവറുകള്‍ നശിപ്പിച്ചതിനെതിരെ ഹൈക്കോടതിയെ സമീപിക്കാനൊരുങ്ങി റിലയന്സ്. വിവാദ കര്‍ഷക നിയമത്തില്‍ പ്രതിഷേധിക്കുന്ന കര്‍ഷകര്‍ അംബാനിയുടെ ജിയോ ബഹിഷ്കരിക്കാന്‍ ആഹ്വാനം ചെയ്തിരുന്നു. പഞ്ചാബിലെ ജിയോ ടവറുകള്‍ നശിപ്പിച്ചത് കര്‍ഷകരാണെന്നാണ് റിലയന്സ് ആരോപിക്കുന്നത്. സംഭവത്തില്‍ അടിയന്തരനടപടി ആവശ്യപ്പെട്ട് പഞ്ചാബ് ഹരിയാന ഹൈക്കോടതിയില്‍ ഇന്ന് ഹര്‍ജി നല്‍കുമെന്ന് റിലയന്സ് ഇന്‍ഡസ്ട്രീസ് ലിമിറ്റഡ് അറിയിച്ചു.
കര്‍ഷകരെ തങ്ങള്‍ക്കെതിരെ തിരിക്കാന്‍ ചില കമ്പനികള്‍ ശ്രമിക്കുന്നതായും ജിയോ ആരോപിക്കുന്നുണ്ട്. ഈ ആക്രമണത്തിലൂടെ ആയിരക്കണക്കിന് ജീവനക്കാര്‍ക്കും ജനങ്ങള്‍ക്കും നഷ്ടമുണ്ടായി. ജിയോ ടവറുകള്‍ ആക്രമിച്ചവരെ തങ്ങളുടെ ബിസിനസ് എതിരാളികള്‍ സഹായിച്ചിട്ടുണ്ടെന്നും റിലയന്സ് ആരോപിച്ചു. റിലയന്‍സിന് കോര്‍പ്പറേറ്റ് ഫാര്‍മിങ്ങിലേക്ക് തിരിയാനുളള പദ്ധതികളില്ല അതിനുവേണ്ടി ഇന്ത്യയില്‍ കൃഷിഭൂമി വാങ്ങിയിട്ടില്ലെന്നും കൂട്ടിച്ചേര്‍ത്തു.
താങ്ങുവില ഉറപ്പാക്കണമെന്നു തന്നെയാണ് ഞങ്ങളും ആഗ്രഹിക്കുന്നത്, ഇന്ത്യയുടെ അന്നദാതാക്കളായ കര്‍ഷകരോട് വളരെയധികം നന്ദിയും ബഹുമാനവുമുണ്ടെന്നും റിലയന്സ് അധികൃതര്‍ പറഞ്ഞു. ഡല്‍ഹിയിലെ കര്‍ഷകരുടെ സമരം ഏറെക്കുറെ സമാധാനപരമാണെങ്കിലും പഞ്ചാബിലെ ജിയോയുടെ 1500 ടവറുകളാണ് നശിപ്പിക്കപ്പെട്ടത്.
