ഡല്‍ഹി: ജനുവരി ഒന്നുമുതല്‍ ജിയോയില്‍ നിന്ന് മറ്റ് നെറ്റ് വര്‍ക്കുകളിലേക്കുളള കോളുകള്‍ സൗജന്യമാക്കുമെന്ന് റിലയന്‍സ് ജിയോ അറിയിച്ചു. ജിയോയില്‍ നിന്ന് മറ്റു നെറ്റ് വര്‍ക്കുകളിലേക്ക് വിളിക്കുമ്പോള്‍ അധിക ചാര്‍ജ് ഈടാക്കുന്നത് അവസാനിപ്പിക്കുന്നതിനാലാണ് കോളുകള്‍ സൗജന്യമാക്കുന്നതെന്ന് ജിയോ വ്യക്തമാക്കി. സാധാരണ ഇന്ത്യക്കാരനെ volTe പോലുളള സാങ്കേതിവിദ്യകളുടെ ഗുണഭോക്താക്കളാക്കാന്‍ ജിയോ പ്രതിജ്ഞാബദ്ധരാണ്, ഉപഭോക്താക്കളുടെ താല്‍പ്പര്യങ്ങള്‍ക്കനുസരിച്ച് പ്രവര്‍ത്തിക്കും, ഓരോ ജിയോ ഉപഭോക്താവും ജിയോയ്ക്ക് പ്രധാനപ്പെട്ടവരാണ് എന്നും ജിയോ അധികൃതര്‍ വ്യക്തമാക്കി.
അതേസമയം, കര്‍ഷകര്‍ റിലയന്‍സിന്‍റെ ജിയോ സേവനങ്ങൾ കർഷകർ ബഹിഷ്കരിക്കുകയും ജനങ്ങളോട് ഇത്തരം കമ്പനികളെ ബഹിഷ്കരിക്കാൻ ആഹ്വാനം ചെയ്യുകയും ചെയ്തിരുന്നു. കാർഷിക മേഖലയെ സ്വകാര്യവൽക്കരിക്കുന്ന മൂന്ന് കാർഷിക നിയമങ്ങൾ പിൻവലിക്കണമെന്ന ആവശ്യവുമായി കര്‍ഷക സമരം ശക്തമായി തുടരുന്നതിനിടെയായിരുന്നു കര്‍ഷകര്‍ അംബാനിക്കെതിരെ തിരിഞ്ഞത്. അംബാനിയടക്കമുള്ള കോര്‍പ്പറേറ്റുകള്‍ക്ക് വേണ്ടിയാണ് കേന്ദ്ര സര്‍ക്കാര്‍ പുതിയ കാര്‍ഷിക നിയമം നടപ്പാക്കിയത് എന്നാണ് കര്‍ഷകര്‍ ഉന്നയിക്കുന്ന പ്രധാന ആരോപണം.
എന്നാല്‍ കര്‍ഷകരെ തങ്ങള്‍ക്കെതിരെ തിരിക്കുന്നത് എയർടെൽ, വോഡഫോൺ ഐഡിയ തുടങ്ങിയ കമ്പനികളാണെന്ന് ജിയോ ആരോപിച്ചു. ജിയോ നമ്പറുകളിൽനിന്ന് മാറുന്നതിന് നിരവധി അഭ്യർഥനകൾ ലഭിച്ചു. യാതൊരു വിധത്തിലുള്ള പരാതികളോ പ്രശ്നങ്ങളോ ഇല്ലാതെയാണ് ഉപഭോക്താക്കൾ ജിയോ ഉപേക്ഷിക്കുന്നതെന്നും പരാതിപ്പെട്ടിരുന്നു. അതിനു പിന്നാലെയാണ് ജിയോ പുതിയ നീക്കവുമായി രംഗത്തെത്തിയിരിക്കുന്നത്.
