ഐ വി ശശിയെ അനുസ്മരിച്ച് മെഗാസ്റ്റാർ മമ്മൂട്ടി. മലയാളത്തിലെ എക്കാലത്തെയും ഹിറ്റ് സംവിധായകനായ ഐ വി ശശി വിടപറഞ്ഞ് 3 വർഷം പൂർത്തിയാകുമ്പോഴാണ് മമ്മൂട്ടിയുടെ അനുസ്മരണം. ഐ വി ശശിയുടെ ചിത്രം സമൂഹമാധ്യമങ്ങളിൽ പങ്കു വെച്ച് ഓർമ പൂക്കൾ എന്ന ഒറ്റവരിമാത്രമാണ് മമ്മൂട്ടി കുറിച്ചിരിക്കുന്നത്.
മമ്മൂട്ടിയുടെ ചലച്ചിത്ര യാത്രയിൽ ഐ വി ശശിക്ക് നിർണായക സ്ഥാനമാണുള്ളത്. 35 ഓളം ചിത്രങ്ങളിലാണ് ഐ വി ശശിയുടെ സംവിധാനത്തിൽ മമ്മൂട്ടി വേഷമിട്ടത്. 1980-90 കളിൽ നിരവധി ഹിറ്റ് ചിത്രങ്ങൾ ഈ കൂട്ടുകെട്ടിൽ പിറന്നു. തൃഷ്ണ, വാർത്ത, അതിരാത്രം, അടിയൊഴുക്കകൾ, അനുബന്ധം, കരിമ്പിൻപൂവിനക്കരെ, കാണാമറയത്ത്,1921 തുടങ്ങിയ ചിത്രങ്ങൾ ബോക്സ് ഓഫീസിൽ തരംഗങ്ങൾ സൃഷ്ടിച്ചിരുന്നു. മമ്മൂട്ടിയെ സൂപ്പർ സ്റ്റാർ പദവിയിലേക്ക് ഉയർത്തിയ ചിത്രങ്ങളായിരുന്നു ഇവ. ബൽറാം VS താരാദാസായിരുന്നു ഇവർ ഒത്തുചേർന്ന അവസാന ചിത്രം.
മമ്മൂട്ടി മോഹൻലാൽ കൂട്ടുകെട്ടിൽ ഏറ്റവും കൂടുതൽ ചിത്രങ്ങൾ സംവിധാനം ചെയ്തത് ഐ വി ശശിയാണ് ആൾക്കൂട്ടത്തിൽ തനിയെ, അതിരാത്രം, വാർത്ത അടിയൊഴുക്കകൾ, അനുബന്ധം, കരിമ്പിൻപൂവിനക്കരെ, ഇടനിലങ്ങൾ, ലക്ഷമണ രേഖ, തുടങ്ങിയ ചിത്രങ്ങളാണ് ഈ കൂട്ടുകെട്ടിൽ പുറത്തിറങ്ങയത്.
35 വർഷം നീണ്ടു നിന്ന കരയിറിൽ 120 ഓളം മലയാളം ചിത്രങ്ങളാണ് ഐവി ശശി സംവിധാനം ചെയ്തത്. എട്ട് തമിഴ് ചിത്രങ്ങളും 3 ഹിന്ദി ചിത്രങ്ങളും, 2 തെലുങ്ക് ചിത്രങ്ങളും ഐ വി ശശിയുടെ സംവിധാനത്തിൽ ഒരുങ്ങിയിട്ടുണ്ട്. 2017 ഒക്ടോബർ 24 ന് 69 ആം വയസിൽ ഐ വി ശശി അന്തരിച്ചു.